३ जुलै २०२५ रोजी लोढा विरोधात मुंबईच्या अंधेरीतील साकीनाका पोलीस ठाण्यात गुन्हा दाखल झाला. १६ वर्षांच्या मुलींचं लैंगिक शोषण केल्याचा, त्यांना डांबून ठेवल्याचा, त्यांचे अश्लील व्हिडीओ काढल्याचा, ब्लॅकमेलिंग केल्याचा आरोप लोढावर होता. या प्रकरणात पोलिसांनी लोढाला ५ जुलैला अटक केली. पॉस्को, बलात्कार, खंडणी, फसवणूक या संबंधित कलमांतर्गत लोढा विरोधात गुन्हा दाखल झाला. या प्रकरणात पीडित मुलींनी जबाब नोंदवला. लोढाकडून मोबाईल, पेन ड्राईव्ह, लॅपटॉप जप्त करण्यात आले. पण काही महत्त्वाच्या सीडी पोलिसांना सापडल्या नाहीत.

साकीनाका पोलिसांच्या अटकेत असलेल्या लोढाची कोठडी संपवणार होती. तितक्यात १४ जुलैला त्याच्याविरोधात अंधेरीच्याच एमआयडीसी पोलीस ठाण्यात आणखी एक गुन्हा दाखल झाला. योगायोग म्हणजे इथेही प्रकरण अल्पवयीन मुलींशीचं संबंधित होतं. त्यामुळे लोढा विरोधात पॉस्को अंतर्गत गुन्हा दाखल झाला. यानंतर एमआयडीसी पोलिसांनी त्याचा ताबा घेतला. लोढाची चौकशी सुरु झाली.

या प्रकरणातील लोढाची कोठडी संपून तो बाहेर येण्याची शक्यता निर्माण झाली. त्याचवेळी लोढा विरोधात आणखी एक गुन्हा दाखल झाला. पिंपरी चिंचवड पोलीस आयुक्तालयाच्या अखत्यारित येणाऱ्या बावधन पोलीस ठाण्यात लोढा विरोधात १७ जुलैला तक्रार दाखल झाली. लोढानं आपल्यावर जबरदस्तीनं अत्याचार केल्याची, आमिष दाखवून फसवणूक केल्याची तक्रार एका महिलेनं केली. त्यानंतर आता लोढाचा ताबा बावधन पोलीस घेणार आहेत. विशेष म्हणजे हे प्रकरण २७ मे २०२५ रोजी घडलेलं आहे. तब्बल ५० दिवसांनी या प्रकरणी गुन्हा नोंदवण्यात आलेला आहे.

२७ मे रोजी काय घडलेलं?
२७ मे रोजी रात्री साडे आठच्या सुमारास लोढानं बालेवाडीतील एका महिलेला कॉल केला. ही महिला लोढाच्या ओळखीची होती. तुझ्या नवऱ्याला नोकरी हवी असेल तर माझ्याशी शरीरसंबंध ठेव. नकार दिलास तर तुझीही नोकरी खाईन, अशी धमकी लोढानं महिलेला दिली. यानंतर पीडित महिला लोढा हॉटेलात भेटली. लोढानं तिच्याशी जबरदस्तीनं शरीरसंबंध ठेवले. या प्रकरणात आता जवळपास दोन महिनांना गुन्हा दाखल झालेला आहे.

अधिवेशन, तारखा अन् लोढा; सेफगेम कोणाचा?
प्रफुल लोढा मंत्री गिरीश महाजन यांच्या जवळचा आहे. विधिमंडळाच्या पावसाळी अधिवेशनात हनीट्रॅपचा विषय गाजला. ३० जूनपासून सुरु झालेलं अधिवेशन १८ जुलैला संपलं. त्याच सुमारास लोढाविरोधात तीन गुन्हे दाखल झाले. त्याची सुटका होईल असं वाटत असताना तो नव्या प्रकरणांमध्ये अडकत गेला. ३ जुलै, १४ जुलै आणि १७ जुलै या तारखा यामध्ये महत्त्वाच्या ठरल्या. अधिवेशन काळात लोढा बाहेर येऊ नये, माध्यमांशी बोलू नये, विरोधक त्याच्यापर्यंत पोहोचू नयेत यासाठी तीन तारखांचा योगायोग जुळवून आणला गेला का, हा प्रश्न आहे.

मुख्यमंत्री देवेंद्र फडणवीस यांचे अतिशय जवळचे असलेले, विश्वासू साथीदार गिरीश महाजन यांचा निकटवर्तीय अशी प्रफुल लोढाची ओळख आहे. लोढा पोलिसांच्या ताब्यात असल्यानं त्याच्याकडे असलेला माहितीचा ‘ऐवज’ बाहेर येणार नाही. त्यामुळेच त्याला पोलीस कोठडीत ठेवलं जातंय का, असा संशय व्यक्त करण्यास जागा आहे. लोढाला पोलिसात सेफ ठेवून कोणाचा सेफ गेम खेळला जातोय का, हा प्रश्न कायम आहे. लोढाचे आका कोण आणि त्याचे आका कोण, असे अनेक प्रश्न या निमित्तानं निर्माण झाले आहेत.