गडेगाव लाखनी येथील सुकराम फसाटे व जितेंद्र सपाटे हे भंडारा जिल्हा दूध संघाचे कर्मचारी आहेत. हे दोघेही दुचाकीने भंडारा येथे कार्यालयात जाण्यासाठी दुचाकीने निघाले होते. वैनगंगेवरील जुन्या पुलावरून जात असताना अचानक त्यांचे दुचाकीवरील नियंत्रण सुटल्याने दोघेही दुचाकीसह थेट नदीत कोसळले. पुलावरून जाणाऱ्या लोकांनी आरडाओरड केल्यानंतर नदीवर आंघोळीसाठी गेलेले तैराकी मित्र मंडळाचे सदस्य यांनी धावत येऊन पुलावरून नदीत उडी घेतली. दोरखंडाच्या मदतीने पुलावरून त्यांना सुखरूप काठापर्यंत ओढत नेऊन दोघांचेही जीव वाचविले.

वैनगंगेवरील जुना पूल धोकादायक झाल्याने या पुलावरून वाहतूक करू नये, असे निर्देश प्रशासनाकडून देण्यात आले आहेत. तरीही हलके वाहनचालक, पायदळ जाणारे नागरिक याच पुलाचा वापर करतात. अलीकडेच आलेल्या पुरामध्ये हा पूल पूर्णपणे बुडाला होता. त्यामुळे हा पूल ठिकठिकाणाहून उखडला गेला आहे. साधी दुचाकीसुद्धा चालविणे जीवावर बेतणारे आहे. तरीसुद्धा या पुलावरुन वाहतूक सुरूच आहे. याशिवाय, पुलावरील कठडे अनेक वर्षांपासून लावण्यात न आल्याने जिल्हा प्रशासनाच्या कारभारावरसुद्धा नाराजी व्यक्त होत आहे.

रेतीमाफियांकडून पोलिसाला चिरडण्याचा प्रयत्न

भंडारा तालुक्यातील खमारी बुटी येथील रेतीचोरी रोखण्यासाठी गेलेल्या पोलिसाच्या अंगावर ट्रॅक्टर चढवून चिरडण्याचा प्रयत्न करण्यात आला. ही खळबळजनक घटना शनिवारी दुपारी साडेतीन वाजतादरम्यान घडली. या हल्ल्यात पोलिस कर्मचारी गायधने यांच्या दोन्ही पायांना गंभीर दुखापत झाली असून त्यांना तातडीने रुग्णालयात दाखल करण्यात आले आहे.

शनिवारी दहा ते बारा पोलिस कर्मचारी रेतीचोरीवर कारवाईसाठी बेलगाव घाटात आले होते. त्यांनी चारही बाजूंनी वेढा घातल्यानंतर मोटघरे नामकच्या ट्रॅक्टरचालकाने घाबरून जाऊन थेट गायधने यांच्या अंगावर ट्रॅक्टर घातला. ट्रॅक्टरच्या धडकेत त्यांच्या पायाला गंभीर दुखापत झाली. घटनेची माहिती मिळताच वरिष्ठ पोलिस अधिकारी घटनास्थळी दाखल झाले. कारवाईदरम्यान अनेक ट्रॅक्टर पकडण्यात आले.