मिरारोडमध्ये २ जुलैला मनसैनिकांनी एका दुकानदाराला मारहाण केली. मराठी भाषा बोलण्यास नकार दिल्यानं मनसैनिकांनी दुकानदाराला हिसका दिला. यानंतर ४ जुलैला स्थानिक दुकानदार आणि व्यापाऱ्यांनी एक दिवस बंद पाळत मोर्चा काढला. त्या मोर्चाला प्रत्युत्तर म्हणून मनसैनिकांनी ८ जुलैला मोर्चाची हाक दिली. पण पोलिसांनी मोर्चाला परवानगी नाकारली. मनसेच्या नेत्यांची धरपकड करण्यात आली. तरीही मनसेचा मोर्चा निघाला. त्यामुळे मराठी विरुद्ध अमराठी वाद आणखी पेटला.

बालाजी सर्कल परिसरात राज ठाकरेंची सभा झाली. याच ठिकाणापासून अवघ्या ३०० मीटरवर असलेल्या जोधपूर स्वीट आणि नमकीन दुकान आहे. याच ठिकाणी राज ठाकरेंच्या कार्यकर्त्यांनी दुकानदाराला चोप दिला होता. त्या दुकानात काम करणाऱ्या बगाराम यांनी राज ठाकरेंच्या सभेआधी या सगळ्या प्रकारावर मोजक्या भाष्यात भाष्य केलं. ‘मराठी ग्राहक येतात तेव्हा त्यांच्याशी बोलतो. समोरची व्यक्ती मराठीत बोलली तर मी पण मराठीत बोलतो. मी २ महिन्यात ऐकून ऐकून मराठी शिकलो. मारहाणीचा प्रकार घडला तेव्हा मी इथे नव्हतो. तेव्हा मालक होते,’ असं बगारामनं सांगितलं. बगाराम मूळचा राजस्थानचा असून १५ वर्षांपासून महाराष्ट्रात वास्तव्यास आहे.

याच दुकानात पोरसवदा मुलंही काम करतात. त्यातील अनेक जण मुंबईत नवे आहेत. कोणी १५ दिवसांपूर्वी, तर कोणी महिन्याभरापूर्वी मुंबईत आलं आहे. मराठी येतं का, या प्रश्नाला त्यांनी नकारार्थी उत्तर दिलं. आताच मुंबईत आलोय. त्यामुळे मराठी फारसं येत नाही, असं या पोरांना सांगितलं. मराठी-अमराठी वाद, त्यातून होत असलेली मारहाण याबद्दल काय वाटतं, मनात भीती आहे का, मराठी शिकणार का, असे प्रश्न त्यांना विचारले असता, डर नही लगता, पर हम मराठी सिखेंगे. जहाँ काम करना है, रहना है, वहाँ की भाषा आना जरुरी है. हम जरुर मराठी सिखेंगे, असं जोधपूर स्वीट दुकानातील मुलांनी सांगितलं.

राज ठाकरेंची सभा रात्री संपन्न झाली. पण या भागात सकाळपासूनच मोठा पोलीस बंदोबस्त तैनात होता. सकाळच्या सुमारास जोधपूर स्वीटचं दुकान उघडलं. पण ते दुपारी अचानक बंद करण्यात आलं. शटर खाली आणलं जात असताना दुकानदार बगाराम यांना याबद्दल विचारलं असता, पोलिसांनी दुकान बंद ठेवण्यास सांगितलं असल्याची माहिती त्यानं दिली.