शहरात मोबाइल अॅपवरून सेवा देणाऱ्या कॅबची संख्या मोठी आहे. या कॅब चालकांकडून आतापर्यंत मोबाइल अॅपवर दाखवलेले दरच आकारले जात होते; पण आता कॅबचालकांनी मीटरप्रमाणेच भाडे घेण्याचे धोरण स्वीकारले आहे. वातानुकूलित कॅबसाठी प्रतिकिलोमीटर २५ आणि साध्या कॅबसाठी २१ रुपये दर आरटीओने निश्चित केला आहे. त्या दरानुसारच कॅब चालकांकडून भाडे घेतले जात आहे; पण अॅपवर दाखवलेल्या दरानुसार प्रवासी कॅब बुक करतात. त्यानंतर कॅबचालक त्यांच्याजवळ येतो अथवा फोन करतो.
वाहनचालकांनो सावधान! ‘ई-चलान’चा मिळताजुळता मेसेज पाठवून होतेय फसवणूक, कशी घ्या खबरदारी
त्यांना कॅबची सेवा ही मीटरनुसार असल्याचे सांगतो. त्यावेळी प्रवासी त्याला अॅपनुसार भाडे देण्याचे सांगतो. अशा वेळी कॅबचालक ‘तुम्हीच कॅब रद्द करा,’ असे सांगून थांबतो. यामध्ये बराच वेळ जातो. यामध्ये प्रवाशांची चिडचिड होऊन कॅबचालक व प्रवाशांत वादावादीचे प्रसंग निर्माण होत आहेत. आरटीओने याबाबत स्पष्टता आणावी, अशी मागणी केली जात आहे.

गिग कामगारांचे आझाद मैदानात आंदोलन

‘शहरातील वाहतूक कोंडी वाढलेली आहे. त्यामुळे नवीन रिक्षा परमिटवर बंदी आणण्यासाठी राज्याचे परिवहन आयुक्त केंद्रीय वाहतूक विभागाकडे बोट दाखवत आहेत, तर केंद्र सरकार राज्याकडे बोट दाखवते, असा खेळ गेली सहा वर्षे चालू आहे. यामध्ये सामान्य नागरिकांचे नुकसान होत आहे. त्यामुळे या व इतर अनेक मागण्यांसाठी राज्यातील ओला, उबेर, स्विगी, झोमॅटोवर काम करणारे हजारो कामगार संपूर्ण महाराष्ट्रातून आझाद मैदानात आज, मंगळवारपासून आंदोलन करणार आहेत. यामध्ये पुणे आणि पिंपरी-चिंचवडहून हजारो गिग वर्कर्स आंदोलनात सहभागी होणार आहेत,’ अशी माहिती भारतीय गिग कामगार मंच, बघतोय रिक्षावाला संघटनेचे अध्यक्ष डॉ. केशव क्षीरसागर यांनी दिली.

मनमानी पद्धतीने भाडे आकारणी

कॅबचालक प्रवाशांना प्रतिकिलोमीटर काहीही भाडे मागत आहेत. सोबत कुटुंबीय, लहान मुले, ज्येष्ठ नागरिक असल्यामुळे प्रवाशांना पर्यायच राहत नाही. त्यामुळे जास्त भाडे सांगितले, तरी द्यावे लागत आहे. मोबाइल कंपन्यांनी त्यांच्या अॅपवर भाडे दाखवू नये, अथवा प्रतिकिलोमीटर आहेत ते दर दाखवावे, अशी मागणी प्रवासी करत आहेत. दोन दिवस झालेल्या या प्रकारामुळे पुणे विमानतळावरील एरोमॉल परिसरात वाहतूक कोंडी होत आहे. प्रवाशांना कॅब मिळवण्यासाठी बराच वेळ थांबावे लागत आहे.