२० ऑगस्ट २०२६ रोजी पाहणी केली

‘एन’ वॉर्डमधील विकासकामांची दखल घेत स्थायी समिती अध्यक्ष प्रभाकर शिंदे यांच्यासह सात सदस्यांनी २० ऑगस्ट २०२६ रोजी पाहणी केली. महापालिका अधिनियमातील कलम ६९-सी अंतर्गत पाच लाख ते ७५ लाख रुपयांपर्यंतच्या एकूण २८ कामांची पाहणी होणार होती.

कामे प्रत्यक्षात नाहीच

मात्र, सुरुवातीच्या ठिकाणांची पाहणी करताच, अनेक कामे प्रत्यक्षात झालेली नसल्याचे समितीच्या निदर्शनास आले. या पाहणीत २८पैकी केवळ एक काम पूर्ण, तीन कामे सुरू, तर तब्बल २४ कामे अद्याप सुरूच झाली नसल्याचे आढळले. त्यानंतर शिंदे यांनी सर्व कामांचा सविस्तर अहवालतयार करून तो स्थायी समितीसमोर सादर करण्याचे निर्देश महापालिका अधिकाऱ्यांना दिले.

अंमलबजावणीवर प्रश्नचिन्ह

महापालिकेतील वरिष्ठ अधिकाऱ्यांच्या माहितीनुसार, स्थायी समितीसमोर येणाऱ्या प्रस्तावांमध्ये संबंधित कामांची स्थिती आणि पूर्णत्वाची माहिती दिली जाते. मात्र, घाटकोपरमधील पाहणीत अनेक कामे सुरूही झाली नसल्याचे समोर आल्याने नोंदी आणि अंमलबजावणीवर प्रश्नचिन्ह निर्माण झाले आहे.

केवळ रंगरंगोटी झाल्याचे दिसले

पाहणीतील बहुतांश कामांची किंमत २५ लाख रुपयांपेक्षा कमी आहे. विक्रोळी पार्कसाइट येथील जुन्या अग्निशमन केंद्राचे काम पूर्ण झाल्याचे दाखवण्यात आले होते. मात्र, प्रत्यक्ष पाहणीत काम फारसे झालेले दिसून आले नाही, केवळ रंगरंगोटी झाल्याचे दिसले, असे एका समिती सदस्याने सांगितले. त्यामुळे काम खरोखर पूर्ण झाले का, याबाबत संशय व्यक्त होत आहे.

Onion Price: कांदाभावात अंशतः दिलासा? केंद्राकडून पुरवठ्यानंतर दरात घट होण्याचे संकेत

गटारदुरुस्तीचे काम अद्याप सुरूच झालेले नाही

स्थायी समितीने घाटकोपर येथील संत मुक्ताबाई रुग्णालयाच्या संरक्षक भिंतीच्या कामाचीही पाहणी केली. तेथे काम सुरू असल्याचे आढळले. अधिकाऱ्यांच्या माहितीनुसार, हे काम सुमारे महिनाभरापूर्वी सुरू झाले आहे. त्यानंतर एस. जी. बर्वे नगर डी चाळ महापालिका वसाहतीतील गटारदुरुस्तीच्या कामाची पाहणी केली असता ते काम अद्याप सुरूच झालेले नसल्याचे समोर आले.

Mumbai News : लोखंडी सळई उडून डोक्यावर आदळली, विद्याविहारमध्ये विद्यार्थी जखमी, डोक्याला टाके, महापालिकेने दुर्लक्ष केल्याचा आरोप

अहवालावरून महापालिका प्रशासनाला जाब विचारला जाऊ शकतो

पाहणीनंतर सविस्तर अहवालाचा अभ्यास करून स्थायी समिती या प्रकरणावर योग्य निर्णय घेईल, असे शिंदे यांनी स्पष्ट केले. या आठवड्यातील स्थायी समिती बैठकीत यावर वादळी चर्चा होण्याची शक्यता आहे. कामांची प्रत्यक्ष स्थिती, कंत्राटदारांना प्रस्तावित देयके आणि दक्षता विभागाच्या अहवालावरून महापालिका प्रशासनाला जाब विचारला जाऊ शकतो. त्यावर प्रशासन काय उत्तर देते, ते कळेल.