बीड जिल्हा मागील काही महिन्यांपासून गुन्हेगारीच्या घटनांमुळे मोठ्या प्रमाणात चर्चेत आहे. आधी सरपंच संतोष देशमुख यांची झालेली हत्या आणि नंतर विविध समाजकंटकांचा उपद्रव यामुळे बीडमधील कायदा-सुव्यवस्थेबाबत वारंवार प्रश्नचिन्ह उपस्थित राहत आहे. अशातच आता माजलगाव तालुक्यातील एक मारहाणीची घटना समोर आली आहे. तालुक्यातील निपाणी टाकळी येथे ग्रामसभा होती.

‘याचे पाय तोडा’; बीडमध्ये सरपंच महिलेच्या पतीने उपसरपंचाला भररस्त्यात बदडलं; VIDEO व्हायरल pic.twitter.com/LRX5C04Bub

— Maharashtra Times (@mataonline) July 13, 2025

ग्रामसभेत उपसरपंच लक्ष्मण चव्हाण यांनी काही प्रश्न विचारले. त्यांनी गावात बनावट कामे करून बिलं काढू नका, असं म्हटलं. तसेच सरपंचांनाच ग्रामसभेला बोलवा, असंही ते म्हणाले. याचा राग सरपंच महिलेचा पती भगवान राठोड याला आला.

अजित पवारांच्या जवळच्या सहकाऱ्याची धक्कादायक एक्झिट; परवा विधानभवनात सगळ्यांना भेटले अन्…

भगवान राठोड आणि त्याचे साथीदार जयकोबा राठोड यांनी लक्ष्मण चव्हाण यांना भर रस्त्यात घेरले. ‘तू ग्रामसभेत बोगस कामाबद्दल कसा बोललास?’ असा जाब विचारला. त्यानंतर त्यांनी लाठ्या-काठ्या आणि दगडांनी मारहाण करायला सुरुवात केली. ‘याचे पाय तोडा’, असेही ते ओरडत होते. ही घटना माजलगाव-परभणी रस्त्यावर शनिवारी सायंकाळी 5 ते 6 च्या दरम्यान घडली.

दरम्यान, या मारहाणीत उपसरपंच लक्ष्मण चव्हाण गंभीर जखमी झाले आहेत. त्यांच्यावर बीडच्या जिल्हा रुग्णालयात उपचार सुरू आहेत. या घटनेमुळे परिसरात तणावाचे वातावरण आहे. पोलीस या प्रकरणाचा तपास करत आहेत. व्हायरल झालेल्या व्हिडिओमुळे लोकांना या घटनेची माहिती मिळाली आणि संताप व्यक्त होत आहे.