एफसी रोड व्यापारी संघटनेचे अध्यक्ष शाम मारणे यांनी गोपीचंद पडळकरांचे सर्व आरोप फेटाळून लावले आहेत. “असे कोणतेही प्रकार घडल्याचं आमच्या निदर्शनास आलेलं नाही. आम्ही ‘ लव्ह जिहाद ‘सारख्या प्रकारास कोणतीही थारा देणार नाही. जर कोणती व्यक्ती मुलींना आमिष दाखवून फसवत असतील, तर तो प्रकार निंदनीय आहे. मात्र अशा कोणत्याही घटना आमच्या माहितीप्रमाणे घडलेल्या नाहीत. जर खरोखरच असे काही घडले असते, तर माध्यमांमध्ये ते गाजले असते आणि पोलिसांकडेही त्याची नोंद असती. परंतु पोलिसांकडे अशा स्वरूपाची कोणतीही तक्रार दाखल झालेली नाही,” असे शाम मारणे म्हणाले आहेत. तर, पडळकर जे म्हणतात तसा प्रकार घडत असेल तर त्यांनी तो थेट आमच्या निदर्शनास आणावा. आम्ही नक्कीच खबरदारी घेऊ. याआधीही एफसी रोड परिसरात बांगलादेशी किंवा रोहिंग्या नागरिकांच्या वावराबाबत आरोप झाले होते, मात्र पोलीस तपासात हे आरोप निराधार ठरले होते, असे देखील मारणे म्हणाले आहेत.

दरम्यान, गेल्या अनेक वर्षांपासून आम्ही याठिकाणी प्रामाणिकपणे व्यापार करत आहोत. मात्र रात्री 10-11 नंतर उशिरा एफसी रोड वरील व्यापाऱ्यांनी दुकान बंद केल्यानंतर इतर भागातून काही व्यापारी येतात ते कोण असतात याबद्दल आम्हाला माहिती नाही. मात्र ते 200 ला नव्हे तर 100 रुपयांना चार कपडे विकतात. त्यांच्याबाबत पोलिसांनी खबरदारी घेणं आवश्यक असल्याचंही मारणे म्हणाले आहेत.

काय म्हणाले होते गोपीचंद पडळकर?

“काही मुलांनी मला सांगितलं की एफसी रोडला मुलींसोबत कपड्याच्या दुकानाच्या माध्यमातून लव्ह जिहादचा प्रकार सुरू आहे. इतर ठिकाणी जो ड्रेस 400 रुपयाला मिळतो तो ड्रेस त्या दुकानांमध्ये 200 रुपयाला मिळतो. त्यामुळे स्वस्त असल्याने आपल्या सगळ्या मुली त्या दुकानांमध्येच खरेदी करायला जातात. शंभर मुली झाल्या की त्यांना टार्गेट केलं जातं. त्यांच्या बिलाच्या माध्यमातून त्यांचे मोबाईल क्रमांक गोळा केले जातात. त्या मोबाईल क्रमांकाच्या माध्यमातून त्या मुलींना टार्गेट केलं जातं आणि त्यातील चार-पाच मुलींना लवह जिहादच्या बळी पाडलं जातं,” असा दावा पडळकर यांनी केला होता.