अंबाजोगाईच्या स्वामी रामानंद तीर्थ रुग्णालयात बाळ जन्माला आले. प्रसूतीदरम्यान मातेच्या गर्भाशयाची पिशवी फुटल्याने डॉक्टरांनी नैसर्गिक गर्भपात करण्याचा निर्णय घेतला. त्यानंतर जन्मलेल्या बाळाने कोणताही प्रतिसाद दिला नाही. त्यामुळे बाळाला मृत घोषित करून कुटुंबीयांच्या ताब्यात देण्यात आले, असे प्रसूती विभाग प्रमुख डॉ. तोंडगे यांनी सांगितले. त्यांच्या म्हणण्यानुसार, “होळ येथील बालिका घुगे ही महिला प्रसूतीसाठी दाखल झाली होती. यावेळी त्यांच्या गर्भाशयाची पिशवी फुटल्याचे समोर आल्याने नैसर्गिक गर्भपात करणे गरजेचे होते. त्यानुसार आम्ही तो केला. त्यानंतर जन्मलेल्या बाळाने कोणताही रिस्पॉन्स दिला नाही म्हणून ते कुटुंबीयांच्या स्वाधीन करण्यात आले होते.”
Sangli News : 19 किमी धावले अन् धाप लागली; सांगलीतील 26 वर्षीय लेफ्टनंटचा हृदयद्रावक मृत्यू
कुटुंबीयांनी बाळाला एका पिशवीत टाकून दुचाकीवरून १७ किलोमीटर दूर असलेल्या होळ गावी नेले. अंत्यसंस्काराच्या वेळी बाळाच्या आजीने त्याला कपड्यातून बाहेर काढले, तेव्हा ते रडू लागले. कुटुंबीयांनी तातडीने बाळाला पुन्हा रुग्णालयात दाखल केले. सध्या बाळावर अतिदक्षता विभागात (ICU) उपचार सुरू आहेत.

या घटनेनंतर रुग्णालयाच्या प्रशासनाने तातडीने दोन चौकशी समित्या नेमल्या आहेत. या समित्या चौकशी करून अहवाल सादर करतील. त्यानंतर योग्य ती कारवाई केली जाईल, असे रुग्णालयाचे प्रभारी अधिष्ठाता डॉ. कचरे यांनी सांगितले. “या संदर्भात संबंधित बाळाच्या नातेवाईकांनी कुठलीही तक्रार नोंदवली नसल्याचे प्रभारी अधिष्ठाता डॉक्टर कचरे यांनी सांगितले आहे.”
Pune News : कात्रज मंडई चौकात ड्युटी बजावतानाच चक्कर येऊन कोसळले, पुण्यात 42 वर्षीय वाहतूक पोलिसाचा चटका लावणारा अंत
दरम्यान, बालरोग तज्ज्ञांच्या मते, डॉक्टरांनी बाळ prematurely जन्मलेले असल्यास काही तपासण्या करणे आवश्यक आहे. त्यानंतर किमान ५० मिनिटे निरीक्षणाखाली ठेवणे आवश्यक आहे. बीडमधील बालरोग तज्ञ डॉक्टर राहुल राऊत म्हणाले, “प्री मॅच्युअर डिलिव्हरी मध्ये जन्मलेले बाळ रिस्पॉन्स देत नसेल तर सात ते आठ प्रकारच्या तपासण्या करणे गरजेचे असते आणि त्या केल्यानंतरही किमान 50 मिनिटे बाळ निरीक्षणाखाली ठेवायचे आणि मगच मृत घोषित करायचे असा वैद्यकीय क्षेत्रातील नियम आहे.”

या घटनेमुळे रुग्णालयाच्या कार्यक्षमतेवर प्रश्नचिन्ह निर्माण झाले आहे. परिसरातील रुग्णांसाठी हे रुग्णालय महत्त्वाचे आहे. त्यामुळे येथे चांगल्या सुविधा मिळणे आवश्यक आहे, अशी मागणी जोर धरू लागली आहे.