राज ठाकरे यांनी केवळ आपल्या पक्षाच्या सर्वसामान्य कार्यकर्त्यालाच नाही तर मोठे नेते, पदाधिकाऱ्यांनादेखील संबंधित आदेश दिला आहे. पक्षाने नेमून दिलेल्या प्रवक्त्यांनी देखील आपल्याला विचारल्याशिवाय किंवा परवानगी घेतल्याशिवाय कुठल्याही प्रकारच्या माध्यमांशी संवाद साधायचा नाही, असा आदेश राज ठाकरे यांनी आपल्या नेतेमंडळींना दिला आहे. त्यामुळे राज ठाकरे यांच्या मनात नेमकं काय आहे? असा प्रश्न उपस्थित होत आहे. या प्रकरणावर कदाचित राज ठाकरे हे स्वत: पत्रकार परिषद घेऊन भूमिका मांडण्याची शक्यता आहे.

राज ठाकरे यांचा नेमका आदेश काय?

“एक स्पष्ट आदेश… पक्षातील कोणीही वर्तमानपत्रं, वृत्तवाहिन्या किंवा कोणत्याही डिजीटल माध्यमांशी संवाद साधायचा नाही. तसंच स्वतःचे प्रतिक्रियांचे व्हिडीओज सोशल मीडियावर टाकायचे हे पण अजिबात करायचं नाही. आणि माध्यमांशी संवाद साधण्याची अधिकृत जबाबदारी ज्या प्रवक्त्यांना दिली आहे त्यांनी देखील मला विचारल्याशिवाय, माझी परवानगी घेतल्याशिवाय त्यांनी देखील कुठल्याही प्रकारच्या माध्यमांशी संवाद साधायचा नाहीये, आणि सोशल मीडियावर व्यक्त व्हायचं नाही”, असं राज ठाकरे म्हणाले आहेत. त्यामुळे आगामी काळात आता काय-काय घडामोडी घडतात? ते पाहणं महत्त्वाचं आहे.

एक स्पष्ट आदेश… पक्षातील कोणीही वर्तमानपत्रं, वृत्तवाहिन्या किंवा कोणत्याही डिजिटल माध्यमांशी संवाद साधायचा नाही. तसंच स्वतःचे प्रतिक्रियांचे व्हिडीओज सोशल मीडियावर टाकायचे हे पण अजिबात करायचं नाही. आणि माध्यमांशी संवाद साधण्याची अधिकृत जबाबदारी ज्या प्रवक्त्यांना दिली आहे…

— Raj Thackeray (@RajThackeray) July 8, 2025

दरम्यान, 5 जुलैला नुकतंच वरळी डोम सभागृहात पार पडलेल्या मेळाव्यात राज ठाकरे यांनी आपल्या भाषणात मनसैनिकांना महत्त्वाचा आदेश दिला होता. मराठी भाषा बोलण्यावरुन वाद घालणाऱ्यांना मारहाण करतानाचे व्हिडीओ बनवू नका आणि ते कुठे शेअरही करु नका, असा आदेश राज ठाकरे यांनी दिला होता. यानंतर आता राज ठाकरे यांनी आज आपल्या ‘एक्स’ अकाउंटवरुन नव्या सूचना दिल्या आहेत.