तब्बल 7 किलोमीटरचा प्रवास झोळीतून
शहादा तालुक्यातील नागझिरी ग्रामपंचायत अंतर्गत येणाऱ्या बुरीनमाळपाडा येथील कविता जोरदार पावरा (वय 29 ) या गर्भवती महिलेला तातडीने वैद्यकीय मदतीची गरज असताना रस्ते आणि वाहन व्यवस्थेअभावी तब्बल 7 किलोमीटरचा प्रवास झोळीतून आणि पायपीट करत प्राथमिक आरोग्य केंद्र राणीपूर येथे घेऊन जावे लागले. या हृदयद्रावक घटनेने दुर्गम भागातील आरोग्य सुविधांची दयनीय अवस्था पुन्हा एकदा समोर आणली आहे.
Nandurbar : धबधब्याच्या पाण्याचा प्रवाह वाढला; अडकलेल्या तरुणांची आरडाओरड, अंगावर काटा आणणारी घटनागावातील महिला आणि आशा कार्यकर्त्यांनी महिलेला झोळीत ठेवले

बुरीनमाळपाडा हे गाव भौगोलिकदृष्ट्या अत्यंत दुर्गम भागात आहे. पावसाळ्याच्या तोंडावर तर येथील परिस्थिती अधिकच बिकट झाली आहे. कच्चे रस्ते चिखलमय झाल्याने रुग्णवाहिका तर सोडाच साधी दुचाकीचीही ने-आण करणे अशक्य झाले आहे. अशा स्थितीत आपत्कालीन प्रसंगी गावकऱ्यांना मोठ्या अडचणींचा सामना करावा लागतो. एका गर्भवती महिलेला प्रसूतीसाठी तातडीने रुग्णालयात नेण्याची वेळ आली. मात्र, वाहन उपलब्ध नसल्याने आणि रस्त्यांमुळे रुग्णवाहिका गावात येऊ शकत नसल्याने गावातील महिला आणि आशा कार्यकर्त्यांनी एकत्र येत महिलेला झोळीत ठेवले.

महिलेची सुखरूप प्रसूती मुलाला दिला जन्म

त्यानंतर चिखलमय पायवाटेने सुमारे 7 किलोमीटरचा खडतर प्रवास करत तिला राणीपूर येथील प्राथमिक आरोग्य केंद्रात पोहोचवले. त्या ठिकाणी महिलेची सुखरूप प्रसूती झाली. तिने 2 किलो 535 ग्रॅम वजनाच्या बालकाला जन्म दिला. मात्र, या घटनेनंतर पुन्हा एकदा दुर्गम भागातील विदारक दृश्य समोर आले आहे. काही दिवसांपूर्वी धडगाव तालुक्यातील केलापाणी येथील तीस वर्षीय युवक रतिलाल परता पाडवी प्रकृती बिघडली. गावाला जाण्यासाठी रस्ता नसल्याने 20 किलोमीटर झोळीतून पायपीट करत तोरणमाळ येथील रुग्णालय गाठावे लागले होते.