पुणे शहरातील वडगाव बुद्रुक परिसरात भरदिवसा धक्कादायक घटना घडली आहे. श्री गजानन ज्वेलर्स या सराफा दुकानावर तीन अज्ञात दरोडेखोरांनी दुपारी सुमारास शस्त्रांच्या धाकाने दरोडा टाकला. अवघ्या काही मिनिटांत त्यांनी सुमारे पाच तोळे सोने लुटून नेले आणि दुकानाच्या मालकीणवर हल्ला करत त्यांना जखमी केले.

नेमकं काय घडलं?

प्राप्त माहितीनुसार, दुपारी दीडच्या सुमारास तीन दरोडेखोर दुकानात शिरले. त्यांच्या हातात कोयते आणि बंदुका होत्या. दुकानात घुसताच त्यांनी वातावरणावर नियंत्रण मिळवत दुकानातील सोन्याचा ऐवज हिसकावून घेतला. त्यांनी प्रतिकार करत असलेल्या दुकान मालकीणवर हल्ला केला. त्यांना किरकोळ दुखापत झाली असून, सुदैवाने प्रकृती स्थिर आहे.

हल्ल्यामुळे परिसरात भीतीचं वातावरण पसरलं आहे. घटनेची माहिती मिळताच चतु:श्रृंगी पोलीस तातडीने घटनास्थळी दाखल झाले. दुकानातील आणि परिसरातील सीसीटीव्ही फुटेज तपासण्याचे काम सुरू आहे. आरोपींची ओळख पटवण्याचा प्रयत्न सुरू आहेत. पोलिसांनी दरोडेखोरांचा शोध घेण्यासाठी विशेष पथक तयार केलं आहे. विविध भागात तपासाची चक्रे वेगाने फिरवली जात आहेत.

या धक्कादायक घटनेनंतर स्थानिक व्यापाऱ्यांमध्ये भीती आणि संतापाचं वातावरण निर्माण झालं आहे. वाढत्या गुन्हेगारी प्रकारांना आळा बसावा यासाठी सराफा व्यावसायिकांकडून सुरक्षा यंत्रणेला अधिक प्रभावी करण्याची मागणी केली जात आहे. पोलीस तपास सुरू असून लवकरच आरोपींना अटक केली जाईल, अशी माहिती अधिकाऱ्यांनी दिली आहे.