देवळाली शिवारात सर्व्हे क्रमांक २९५ वरील शंभर कोटींचा ‘टीडीआर’ घोटाळा पुन्हा चौकशीच्या फेऱ्यात आला आहे. सिन्नर फाट्यावरील जागा असताना जागामालकाने बिटको चौकातील जागेचा ‘टीडीआर’ घेऊन महापालिकेची शंभर कोटींची आर्थिक फसवणूक केली. या प्रकरणी ॲड. शिवाजी सहाणे आणि सलीम शेख यांनी तक्रार केली होती. विधिमंडळातही हा वाद पोहचला होता. त्यामुळे तत्कालीन अतिरिक्त आयुक्त सुरेश खाडेंची चौकशी समिती नियुक्त केली होती. त्यानंतर याप्रकरणी विधान परिषदेचे सभापती प्रा. राम शिंदे यांनीही चौकशीचे आदेश दिले आहेत. तथ्य आढळल्यास दोषी अधिकाऱ्यांवर तत्काळ गुन्हे दाखल करून अहवाल सादर करण्याच्या सूचनाही देण्यात आल्या आहेत. या बैठकीत खाडेंच्या चौकशी समितीने क्लीनचिट दिल्याचे समोर आले आहे. या प्रकरणाची नव्याने चौकशी करताना महापालिकेने कुठल्या आधारे क्लीनचिट दिली, याचाही खुलासा मागविला आहे. त्यामुळे ही क्लीनचिटही वादाच्या भोवऱ्यात सापडली असून, तत्कालीन चौकशी समितीचे सदस्यही रडारवर आले आहेत.
Paddy Scam: गांगुर्डे अखेर बडतर्फ! २८ कोटींचा धान घोटाळा सिद्ध, आदिवासी विकास महामंडळ पुन्हा चर्चेत
या प्रकरणाची दुसऱ्यांदा चौकशी सुरू झाली असताना यातील दोषींवर कारवाईसाठी रविराज ताकवणे यांनी पोलिस आयुक्त संदीप कर्णिक यांच्याकडे गुन्हा दाखल करण्यासाठी तक्रार अर्ज दाखल केला आहे. या प्रकरणात विलास शाह, विराज शाह, स्नेहा विराज शाह, मीना मोहन चव्हाण, कन्हैयालाल मोटवानी, दिनेश मनवानी, विनोद मनवानी, तत्कालीन आयुक्त अभिषेक कृष्णा, नगररचना विभागाचे सहसंचालक आकाश बागूल, तत्कालीन मुद्रांक निरीक्षक, तत्कालीन उपनिबंधक अशा तेरा जणांवर गुन्हा दाखल करण्याची मागणी त्यांनी केली आहे. या घोटाळ्याची सर्व कागदपत्रे आपल्याकडे असल्याने गुन्हा दाखल करावा, अशी विनंती त्यांनी केली आहे. त्यामुळे अधिकाऱ्यांसह संबंधित बांधकाम व्यावसायिकांची पाचावर धारण बसली आहे.