“मला आता भारतीय जनता पार्टीमध्ये यायची अजिबात इच्छा नाही. माझी भाजपमध्ये यायची इच्छा होती. पण बॉम्बस्फोटामध्ये दाऊद इब्राहिमच्या सोबत जो सलीम कुत्ता आहे त्याच्यासोबत नाचणाऱ्यांना भाजपमध्ये घेतले असल्याने मला भाजपमध्ये जाण्याची इच्छा नाही. त्यामुळे बॉम्बस्फोटातील गुन्हेगारांसोबत माझी काम करायची इच्छा नाही”, असं वक्तव्य एकनाथ खडसे यांनी केला.

खडसेंचा महाजनांना टोला

“मी महाविकास आघाडीमध्ये जरी असलो तरी मी 40 वर्ष भारतीय जनता पार्टीमध्ये काम केलेलं आहे. मी आणीबाणीचे चटके सोसले आहेत. त्यावेळी मी 25 वर्षांचा होतो. तरी आणीबाणीचा काळ मी अनुभवला आहे”, असं एकनाथ खडसे म्हणाले. “संघाने कोणी कोणत्या पक्षात रहावे याबाबत सूचना केलेल्या नाहीत. भाजप म्हणजे संघ असेल, असे गिरीश महाजन म्हणत असतील तर ते संघाने स्पष्ट करणे आवश्यक आहे. मी देखील संघाचा स्वयंसेवक आहे. संघाने कधी भाजपमध्ये राहा असे सांगितले नाही. भारतीय जनता पार्टीमध्ये राहा किंवा काँग्रेस पक्षामध्ये राहा. पण हिंदुत्वाचा मुद्दा राहिला पाहिजे हेच संघाने शिकवलं आहे”, असं एकनाथ खडसे म्हणाले.

“गिरीश महाजन यांचा जन्म झाला नव्हता त्या कालखंडापासून मला इतिहास माहिती आहे. 1983 ला विश्व हिंदू परिषदेचे संत संमेलन झाले होते. हे संमेलन आळंदीला झाले होते. त्या संमेलनामध्ये मी हजर होतो. 1982 ते 1983 ला तळजाईमध्ये राष्ट्रीय स्वयंसेवक संघाचे शिबिर झाले होते. त्यावेळी 35000 स्वयंसेवक उपस्थित होते. तीन दिवस ते शिबिर होतं आणि तीनही दिवस मी त्या शिबिराला उपस्थित होतो. त्यामुळे संघाचा माझा 82-83 पासून संबंध आहे. मी काही 1990 ला जन्माला आलेलो नव्हतो. त्यामुळे 1982-83 ला गिरीश महाजन हे बालवयात असल्यामुळे ते बाल स्वयंसेवक असू शकतील”, असा टोला एकनाथ खडसे यांनी लगावला.