नागपूरच्या सुनीता जामगडे या महिलेच्या अचानक बेपत्ता होण्याच्या घटनेमुळे सुरक्षा यंत्रणांमध्ये खळबळ उडाली आहे. कारगिलच्या सीमेवरील शेवटच्या ‘हुंदरमान’ गावातून तिने नियंत्रण रेषा (LoC) ओलांडून पाकिस्तानात प्रवेश केल्याचा संशय व्यक्त करण्यात येत आहे.
सुनीता जामगडे (वय ४३) ही नागपूरमधील संत कबीर नगर भागात राहणारी असून, ती पूर्वी एका खासगी रुग्णालयात परिचारिका म्हणून काम करत होती. ती १४ मे रोजी आपल्या १२ वर्षीय मुलासह काश्मीरच्या दिशेने निघाली. पुढे ती लडाखच्या कारगिल जिल्ह्यातील हुंदरमान या शेवटच्या गावात पोहोचली. मात्र, तिने आपल्या मुलाला “थोड्याच वेळात परत येते” असे सांगून सोडून दिले आणि त्यानंतर तिचा काहीही थांगपत्ता लागलेला नाही. स्थानिक नागरिकांनी हा मुलगा एकटाच फिरताना पाहून त्याला तातडीने लडाख पोलिसांच्या हवाली केले.
Arvind Kejriwal: केजरीवालांना मोठा धक्का; आपच्या वरिष्ठ नेत्यांकडून वेगळ्या गटाची घोषणा, पक्षाचं नावही ठरलं
गुप्तचर यंत्रणांनी दिलेल्या माहितीनुसार, सुनिता ही काही काळापासून पाकिस्तानमधील एका धर्मगुरूच्या संपर्कात होती. त्याच्यासोबतच्या ऑनलाइन संभाषणांमुळे ती मानसिकदृष्ट्या प्रभावित झाली होती, असा संशय आहे. याआधीही तिने दोन वेळा अमृतसरमधील अटारी बॉर्डरवरून पाकिस्तानात प्रवेश करण्याचा प्रयत्न केला होता. मात्र, सुरक्षा यंत्रणांनी वेळेवर हस्तक्षेप करत तिला परत पाठवले होते. सुनीता जामगडे सध्या पाकिस्तानात असल्याची शक्यता वर्तवण्यात येत आहे. काही पाकिस्तानी नागरिकांनी तिला एलओसी जवळ पाहिल्याचे सांगितले असून, तिला ताब्यात घेतल्याचीही माहिती गुप्तचर यंत्रणांकडून मिळाली आहे. मात्र, याला अद्याप अधिकृत दुजोरा मिळालेला नाही.
सुनिताची मानसिक अवस्था स्थिर नसल्याचे तिच्या आईने पोलिसांना सांगितले असून, तिच्यावर नागपूरच्या शासकीय रुग्णालयात काही काळ उपचारही झाले होते. या संपूर्ण प्रकरणाची गंभीर दखल घेत राज्य आणि केंद्र सरकारच्या सुरक्षा यंत्रणांनी तात्काळ तपास सुरू केला आहे. ती प्रत्यक्षात पाकिस्तानात गेली आहे की नाही, हे अजूनही स्पष्ट झालेले नसले तरी, परिस्थिती अत्यंत संवेदनशील मानली जात आहे. दरम्यान, कपिल नगर पोलिसांनी सुनीताच्या मुलाला नागपूरला परत आणण्यासाठी लडाख प्रशासनाशी संपर्क साधला आहे. सुनीताचा शोध घेण्यासाठी विविध पातळ्यांवर तपास सुरू असून तिच्या मानसिक अवस्थेचा सखोल अभ्यास केला जाणार आहे.