केरळमध्ये दाखल होण्याचा सर्वसाधारण दिवस १ जून आहे. मात्र यंदा मान्सूनचा अंदमानच्या समुद्रापर्यंतचा प्रवासही आधी सुरू झाला आहे. या पार्श्वभूमीवर मान्सूनचा पुढचा प्रवासही सुरळीत पार पडण्याची शक्यता आहे. केरळमधून देशात मान्सून दाखल होण्याच्या आधी वातावरणात बदल नोंदवला जातो. कोरड्या आणि उष्ण वातावरणानंतर पावसाळी वातावरण जाणवू लागते. १ जूनला मान्सून दाखल होईल, असा अंदाज वर्तवताना यामध्ये मान्सून आगमनाच्या तारखेच्या पुढे- मागे सात दिवसांचा कालावधी गृहीत धरला जातो. गेल्या पाच वर्षांमध्ये दोनवेळा मान्सून १ जूनच्या आधी केरळमध्ये दाखल झाला होता. २०२४मध्ये ३० मे तर २०२२ मध्ये २९ मे रोजी मान्सून केरळमध्ये धडकला. २०२२मध्ये २७ मे रोजी मान्सून दाखल होईल, असा अंदाज वर्तवण्यात आला होता तर, २०२४मध्ये ३१मेरोजी मान्सून दाखल होण्याचा अंदाज होता. केरळमध्ये मान्सून दाखल होण्याचा अंदाज भारतीय हवामान विभाग२००५ पासून वर्तवण्यात येत आहे.
वरिष्ठ अधिकाऱ्यांच्या सुट्टया रद्द; आरोग्य, आपत्ती व्यवस्थापन विभागासाठी राज्य सरकारचा निर्णय
मान्सून दाखल होण्याचा अंदाज वर्तवण्यासाठी सहा निकष मानले जातात. यामध्ये वायव्य भारतातील किमान तापमान, दक्षिण द्वीपकल्पामध्ये मान्सूनपूर्व काळामध्ये पडणारा पाऊस, इंडोनेशियावरील वरच्या थरातील उष्णकटिबंधीय क्षेत्रीय वारा, ईशान्य हिंदी महासागरावरील खालच्या थरातील उष्णकटिबंधीय क्षेत्रीय वारा, दक्षिण चीन समुद्रावरील थर्मल रेडिएशन, उष्णकटिबंधीय वायव्य प्रशांत महासागरावरील समुद्रसपाटीचा सरासरी दाब हे घटक लक्षात घेऊन अंदाज वर्तवला जातो.

‘यंदाचा २७ मेचा अंदाज हा या तारखेच्या पुढे-मागे चार दिवस या कालावधीमध्ये मान्सून आगमनाचा समजला जाईल. म्हणजे २३ ते ३१ मे या कालावधीत यंदा मान्सूनचे आगमन अपेक्षित आहे. केरळमध्ये मान्सून दाखल झाल्यानंतर महाराष्ट्रासंदर्भातील अंदाज वर्तवण्यात येईल. मुंबईत १० जूनला व सह्याद्री ओलांडून महाराष्ट्राच्या अंतर्गत भागात १५ जूनला मान्सून अपेक्षित असला तरी अरबी समुद्रात पश्चिम किनारपट्टी समांतर मुंबईकडे येणाऱ्या मान्सूनच्या प्रवाहात बळकपणा किती आहे, हे पाहूनच महाराष्ट्रात मान्सून जूनच्या कोणत्या तारखेला प्रवेश करील, हे सांगता येईल,’ असे निवृत्त हवामान अधिकारी माणिकराव खुळे यांनी सांगितले.
जगाला हेवा वाटेल असे ज्ञानपीठ आळंदीत उभारणार; मुख्यमंत्री फडणवीसांची घोषणा, ७०१ कोटींचा आराखडा तयार
उर्वरित मे महिना कमी तापदायक
मान्सून आगमनापूर्वी मान्सूनपूर्व सरींचीही महाराष्ट्रामध्ये अपेक्षा आहे. मध्य महाराष्ट्राच्या काही जिल्ह्यांमध्ये तसेच मराठवाडा, विदर्भ येथे १४ मेपर्यंत अवकाळी पाऊस पडू शकतो. त्यामुळे या विभागांमध्ये कमाल तापमानाचा पारा सरासरीपेक्षा खूप चढा राहणार नाही, असा अंदाज वर्तवण्यात येत आहे. त्यामुळे महाराष्ट्रासाठी उर्वरित मे महिना तुलनेने कमी तापदायक ठरेल अशीही शक्यता आहे

वर्ष –मान्सून दाखल –मान्सून दाखल होण्याचा अंदाज
२०२० —१ जून —५ जून
२०२१ —३ जून —३१ मे
२०२२ —२९ मे —२७ मे
२०२३ —८ जून —४ जून
२०२४ —३० मे —३१ मे