जळगावातील पाचोरा ते परधाडे रेल्वे स्टेशनजवळ सोमवारी 5 मे 2025 रोजी रात्री 10 वाजेच्या सुमारास एकाच परिवारातील तीन सदस्यांचा दुर्दैव मृत्यू झाल्याची हृदय हेलावणारी घटना उघडकीस आली आहे. पाचोरा ते परधाडे रेल्वे स्टेशनदरम्यान डाऊन लाईनवरील खंबा किलोमीटर क्रमांक 376/19 जवळ एकाच अज्ञात परिवारातील तीन सदस्यांचा मृतदेह आढळून आला असून हृदय हेलकावणारी धक्कादायक घटना घडली आहे, यात एक महिला एक पुरुष तर एक सुमारे 3 वर्षीय चिमुकल्या बाळाच्या मृतदेहाचा समावेश आहे.
Buldhana News: बोहल्यावर चढण्यापूर्वीच काळाची झडप, ट्रकची जोरदार धडक, तरुणाचा जागीच मृत्यू, मामाचे दोन्ही पाय…
या घटनेची माहिती मिळताच पाचोरा पोलीस स्टेशनचे सहायक पोलीस निरीक्षक दिनेश भदाने, पोलीस उपनिरीक्षक योगेश गणगे, पोलीस हेड कॉन्स्टेबल राहुल शिंपी, मनोहर पाटील, अशोक हटकर, पोलीस कॉन्स्टेबल समाधान बोरसे व जय मल्हार रुग्णवाहिकेचे चालक किशोर लोहार यांच्या मदतीने तिघेही मृतदेह पाचोरा ग्रामीण रुग्णालय येथे आणण्यात आले आहेत. रुग्णवाहिका संचालक बबलू मराठे, रुग्णवाहिका 108 चे चालक मनोज पाटील यांच्या मदतीने मृतदेह पाचोरा ग्रामीण रुग्णालयात नेण्यात आले असून या घटनेचा पुढील तपास पाचोरा पोलीस करीत आहेत. तर या घटनेविषयी कुणाला काहीही माहिती असल्यास तसेच मृतदेहाची ओळख पटवण्यास मदत करण्याचं आवाहन पाचोरा पोलिसांनी केले आहे.

या तिघांनी अशाप्रकारे आपल्या आयुष्याची अखेर का केली, याचं कारण अद्यापही समजू शकलेलं नाही. तसेच, पोलिसांसमोर सध्या मृतदेहांची ओळख पटवण्याचं मोठं आव्हान आहे. हे तिघेजण मध्य प्रदेशातील असल्याची माहिती आहे. त्यामुळे मृतदेहांची ओळख पटवणे, यासाठी पोलिसांना मोठी कसरत करावी लागत आहे. पण, एका चिमुकल्यासह तिघांच्या मृत्यूने परिसरात हळहळ व्यक्त केली जात आहे.