“अजित पवार जर निधी वळवत असतील तर त्यांना मुख्यमंत्र्यांनी जाब विचारावा”, असंदेखील लक्ष्मण हाके म्हणाले. तसेच “मंत्री संजय शिरसाट यांनी सामाजिक न्याय मंत्रीपदाचा राजीनामा द्यावा”, अशी देखील मागणी लक्ष्मण हाके यांनी केली. यावेळी त्यांनी राज्य मंत्रिमंडळाची बैठक चौंडी येथे होत असल्याचा आनंद असल्याचं म्हटलं. “चौंडी या ठिकाणी कॅबिनेट होत असल्याचा आनंद आहे. मात्र या कॅबिनेट नुसत्या सह्या करण्यासाठी नको”, असं मत लक्ष्मण हाके यांनी मांडलं आहे.

लक्ष्मण हाके काय-काय म्हणाले?

“सामाजिक न्याय विभागाचे संजय शिरसाट मंत्री आहेत. त्यांनी आपली हतबलता या महाराष्ट्रात व्यक्त केली आहे. मी त्याच्याही पुढे जावून या महाराष्ट्राचे अर्थमंत्री अजित पवार यांच्या हेतूवर प्रश्न उपस्थित करेन. कारण गेल्या कित्येक वर्षापासून महाराष्ट्राच्या अर्थ खात्यावर ते कायम ठाण मांडून बसले आहेत. खरंतर सामाजिक न्याय विभागाचा, समाज कल्याण विभागाचा निधी इतर कुठेही कायद्याने वळवता येत नाही”, असं लक्ष्मण हाके म्हणाले.

“एससी विभागाचे 410 कोटी आणि एसटी विभागाचे 350.5 कोटी असे टोटल 746 कोटी रुपये या महाराष्ट्राच्या अर्थमंत्र्याने वेगवेगळ्या खात्यांकडे वळवले आहेत. कोण म्हणतं लाडक्या बहीण योजनेकडे वळवले आहेत. शासनाने लोककल्याणकारी योजना राबवाव्यात. त्याला आमचं दुमत असण्याचं कारण नाही. पण अजित दादांना आमचा सवाल आहे. अजित दादा यांच्या एका कारखान्याचं उत्पन्न मिळतं तेवढं देखील या सामाजिक न्याय विभागाचं बजेट नाही”, असा मोठा दावा लक्ष्मण हाके यांनी केला.

(सविस्तर बातमी अपडेट होत आहे. संपूर्ण बातमी वाचण्यासाठी कृपया आपलं वेबपेज रिफ्रेश करा.)