सिंहगड रस्त्यावरील वाहतूक कोंडी हा शहरातील सर्वाधिक चर्चेचा विषय आहे. या उड्डाणपुलाची एक बाजू पूर्ण झाली असून, त्याचे उद्घाटन करून वाहनांसाठी तो खुला करावा, अशी मागणी जोर धरू लागली होती. या पुलाचे उद्घाटन २७ अथवा २८ एप्रिल रोजी मुख्यमंत्री देवेंद्र फडणवीस यांच्या हस्ते होणार होते. त्यासाठीची तयारीही सुरू झाली होती; परंतु या कार्यक्रमास पुरेसा वेळ देता येणे शक्य नसल्याने तो कार्यक्रम बारगळला. त्यानंतर या पुलाचे उद्घाटन पवार यांच्या हस्ते करण्याचा निर्णय घेण्यात आला.

मुंबई येथे पंतप्रधान नरेंद्र मोदी यांचे ‘महाराष्ट्र दिनी’ कार्यक्रम असल्याने पवार यांनी सकाळी सात वाजताच उड्डाणपुलाच्या उद्घाटनाचा ‘मुहूर्त’ शोधला. मात्र, उर्वरित दोनपैकी एका मंत्र्याने हा कार्यक्रम किमान दुपारी तरी घ्यावा, अशी सूचना महापालिका प्रशासनाकडे केली. ‘महाराष्ट्र दिना’चे अन्य कार्यक्रम असल्याने ही वेळ वाढवावी, अशी त्यांची भूमिका होती, तर दुसऱ्या एका मंत्र्याने हे उद्घाटन सायंकाळी घ्यावे, अशी भूमिका महापालिकेने कळवली होती. मात्र, पवार यांना पंतप्रधान मोदी यांच्या कार्यक्रमास तातडीने मुंबईला जायचे असल्याने त्यांनी सकाळचा ‘मुहूर्त’ शोधला. यामुळे अनेकांसह महापालिकेच्या अन्य कार्यक्रमांचेही वेळापत्रक बदलले आहे. या तिन्ही मंत्र्यांच्या वेळा साधताना मेटाकुटीला आलेल्या पालिकेने पवार यांच्या आदेशाची अंमलबजावणी करण्याचा निर्णय घेऊन वेळेची ‘मात्रा’ साधली आहे.

महापालिकेने सिंहगड रस्त्यावरील राजाराम पुलापासून फनटाइम थिएटरपर्यंत उड्डाणपुलाचे काम २१ सप्टेंबर २०२१ रोजी सुरू केले. या उड्डाणपुलासाठी ११८ कोटी रुपये खर्च आला. या पुलाच्या कामाची मुदत डिसेंबर २०२५पर्यंत असली, तरी तो त्यापूर्वीच पूर्ण करण्यात पालिकेला यश आले आहे. यापैकी सिंहगड रस्त्याकडून स्वारगेटकडे जाणारा सुमारे ६५० मीटर लांबीचा उड्डाणपूल खुला झाला. त्यानंतर आता विठ्ठलवाडी कमानीपासून सुरू होऊन ‘फनटाइम थिएटर’पाशी उतरणारा उड्डाणपूल उद्घाटनाच्या प्रतीक्षेत आहे. यामुळे स्वारगेटकडून धायरी, नऱ्हे, खडकवासला आदी भागांत जाणाऱ्या वाहनचालकांना इनामदार चौक, हिंगणे चौक, संतोष हॉल, मोरे चौक, शिवा काशीद चौक या पाच चौकांमध्ये सिग्नलला थांबण्याची गरज पडणार नाही.

पालिकेचे असे नियोजन…

महापालिकेचे प्रशासक डॉ. राजेंद्र भोसले सकाळी सहा वाजता पालिकेत येतील. छत्रपती शिवाजी महाराज आणि महात्मा फुले यांचा पुतळा; तसेच डॉ. बाबासाहेब आंबेडकर यांच्या पुतळ्यास पुष्पहार अर्पण केल्यानंतर ६ वाजून २५ मिनिटांनी ते ध्वजवंदन करतील. सूर्योदयाची वेळ ही सकाळी सहा वाजून सात मिनिटांनी असल्याने ध्वजवंदनाची वेळ ही ६ वाजून २५ मिनिटे अशी करण्यात आली आहे. ध्वजवंदन झाल्यानंतर महापालिका आयुक्त तातडीने सिंहगड रस्त्यावरील उड्डाणपुलाच्या कार्यक्रमस्थळी पोहोचतील, असे नियोजन करण्यात आले आहे.