Washim Soldier Death : शेंदुरजना मोरे गावचे जवान वासुदेव संभाजी शेळके यांचे कार अपघातात निधन झाले. ते नातेवाईकाच्या विवाह सोहळ्यासाठी जात असताना मानोरा-तळप मार्गावर हा अपघात झाला. गुवाहाटी येथे बीएसएफमध्ये कार्यरत असलेले वासुदेव शेळके रजेवर होते आणि लवकरच ते सेवानिवृत्त होणार होते. त्यांच्या निधनाने परिसरात शोककळा पसरली आहे.
गुवाहाटी येथे बीएसएफमध्ये सेवेत कार्यरत असलेले वासुदेव शेळके रजेवर आले होते. ते काही महिन्यांनंतर सेवानिवृत्त होणार होते. त्यासाठी त्यांनी आवश्यक कागदपत्रांची तयारीही सुरू केली होती. सेवानिवृत्तीनंतर गावात नगरभोजन देण्यासाठी त्यांनी अगोदरच ९ क्विंटल गहू साठवून ठेवले होते. दुर्दैवाचे चक्र असे फिरले की, ते गहू आता त्यांच्या तेरवीच्या कार्यात वापरले जाणार आहेत, याची कल्पनाही त्यांनी कधी केली नसेल.
मृदू, प्रेमळ आणि मनमिळावू स्वभावाच्या वासुदेव शेळके यांनी आपल्या सेवाभावी वृत्तीने परिसरात एक वेगळी ओळख निर्माण केली होती. त्यांच्या अचानक झालेल्या निधनामुळे गावात हळहळ व्यक्त होत असून, प्रत्येकाच्या डोळ्यांत अश्रू दाटले आहेत. त्यांच्या पश्चात पत्नी, एक मुलगा, आई-वडील आणि सर्व कुटुंबीय असा परिवार असून त्यांच्यावर दुःखाचा डोंगर कोसळला आहे.
पुलगावहून आलेल्या बटालियनच्या जवानांनी शोकसभेत सामील होत आपल्या सहकाऱ्याला सशस्त्र मानवंदना दिली. यावेळी तहसीलदार रवी राठोड, मंडळ अधिकारी मोहन श्रावणे, परिसरातील नागरिक मित्र परिवार, ग्रामपंचायत सरपंच, सदस्य तसेच ग्रामस्थ मोठ्या संख्येने उपस्थित होते.