काल (मंगळवारी) दुपारी आम्ही गेलो होतो. त्यानंतर आम्ही तेथून निघालो आणि काही अंतरावर गेलो नाही तोच पंधरा मिनिटात आम्हाला अचानक गोळीबाराचा आवाज आला. बातमी मिळाली की दहशतवाद्यांनी पर्यटकांवर हल्ला केला. रस्त्यावर सीआरपीएफ, आर्मीच्या जवनांची धावपळ सुरु होती. जर १५ मिनिटं तिथेच थांबलो असतो तर आम्ही पण, दहशतवाद्याच्या जाळ्यात अडकलो असतो, अशी आपबीती जम्मू-काश्मीरमध्ये अडकलेल्या साक्षी लोलगे आणि कृष्णा लोलगे या पती-पत्नीने सांगितली.

कृष्णा लोलगे हे आडत व्यापारी आहे. दिड वर्षांपूर्वी त्याचा साक्षी सोबत विवाह झाला होता. लग्नानंतर ते फॉरेनला गेले होते. शनिवारी आयटीसी टूर्स अँड ट्रॅव्हल्सच्या माध्यमातून शनिवारी दुपारी २ वाजता ते हैदराबाद येथून विमानाने जम्मू-काश्मीरला रवाना झाले. सायंकाळी ६ वाजता श्रीनगर येथे पोहचले. त्यानंतर तिथे मुक्काम केल्यानंतर दोघे जण रविवारी दुपारी पहलगाम येथील बैसरन या पर्यटन ठिकाणी गेले होते. घटनेच्या पंधरा मिनिटापूर्वी दोघेजण त्याच भागातून काही अंतर पार करून गेले होते. पंधरा मिनिटानंतर दहशतवाद्यानी गोळीबार केला. दरम्यान, घटनेनेनंतर कृष्णा लोलगे आणि त्यांची पत्नी साक्षी लोलगे यांना तेथील मदतनिसांनी हॉटेलवर सोडलं. दहशतवादी हल्लाचा थरारक अनुभव त्यांनी व्ह‍िडिओ कॅलद्वारे सांगितला आहे. त्यांचा व्हिडिओही व्हायरल झाला आहे.

देवाच्या कृपेने माझा मुलगा आणि सून सखरूप असल्याचे असल्याचे कृष्णा यांचे वडील मधुकर लोलगे यांनी सांगितले. दोन दोन तास तिथे घोडेस्वार येत नाहीत. घोडेस्वारी ची पर्यटकांना वाट पहावी लागते. मात्र, घटनेपूर्वी घोडेस्वार आल्यामुळे मुलगा आणि सून सुखरूप आहेत अस मधुकर लोलगे यांनी सांगितले.

दरम्यान शुभम सूर्यकांत गुंडाळे (३०) व त्यांची पत्नी शिवानी शुभम गुंडाळे (२७) (रा. कुंडलवाडी ता. बिलोली जि. नांदेड) हे दोघेही हे श्रीनगर येथे फिरण्यासाठी गेले होते. घटनेनंतर ते देखील जम्मू कक्ष्मीरमध्ये अडकले असले तरी येथे ते सुखरूप असल्याची माहिती त्यांच्याच कुटुंबातील व्यक्तींनी प्रशासनाला दिली आहे. दरम्यान, या सर्वांच्या प्रशासन संपर्कात आहे. हे चौघेही जण काही दिवसांपूर्वी गेले होते. लवकरच ते परत येतील, असे प्रशासनातर्फे सांगण्यात आले आहे.

नांदेडला पोचण्यासाठी प्रशासनाने मदत करावी

नांदेड जिल्ह्यातील सहाजण जम्मू-काश्मीर येथे अडकले आहेत. यामध्ये बरबडा येथील चार भावांचा समावेश आहे. मोरारजी बापू यांची कथा एकण्यासाठी संतोष पचलिंग, बाबुराव पचलिंग, विनोद पचलिंग आणि दामोदर पचलिंग १५ एप्रिल रोजी निघाले होते. श्रीनगर येथे ते आहेत. हे सर्वजण सुखरूप असून एका हॉटेलमध्ये वास्तव्यास आहेत. प्रशासनाने त्यांना सुखरूप परत आणण्यासाठी मदत करावी असे आवाहन त्यांनी केले आहे.