अंबरनाथच्या हुतात्मा चौकाजवळ उद्योजक विश्वनाथ पनवेलकर यांचं सीताई सदन नावाचं निवासस्थान आहे. आज दुपारी अडीच वाजताच्या सुमारास पनवेलकर यांच्या घराबाहेर दुचाकीवरून दोन अज्ञात हल्लेखोर आले. त्यांनी पनवेलकर यांच्या घराच्या गेटच्या दिशेने दोन गोळ्या झाडत तिथून पळ काढला. ही संपूर्ण घटना पनवेलकर यांच्या घराबाहेर असलेल्या सीसीटीव्ही कॅमेरात कैद झाली. याप्रकरणी आता शिवाजीनगर पोलीस, तसंच क्राईम ब्रँचची टीम घटनास्थळी दाखल झाली असून पोलिसांकडून तपासाला सुरुवात करण्यात आली आहे.

पनवेलकर यांच्या घराबाहेर झालेल्या गोळीबाराचं सीसीटीव्ही फुटेज समोर आलं आहे. १४ सेकंदांच्या फुटेजमध्ये एक दुचाकी वर्दळीच्या रस्त्यावरुन येताना दिसत आहे. ही दुचाकी पनवेलकर यांच्या घराबाहेर येऊन थांबते. याच सुमारास एक रिक्षादेखील रस्त्यावर थांबलेली दिसते. त्यातून ३ महिला उतरत असतात. तितक्यात दुचाकीवरील एक जण बंदूक काढून पनवेलकरांच्या निवासस्थानाच्या दिशेनं २ गोळ्या झाडतो. हा प्रकार रिक्षातून उतरणाऱ्या महिला पाहतात. त्यांना नेमकं काय घडतंय, ते समजत नाही. पुढच्या काही क्षणांमध्ये अज्ञात हल्लेखोर दुचाकीवरुन पसार होतात. वर्दळीच्या रस्त्यावर हा संपूर्ण प्रकार घडल्यानं खळबळ उडाली आहे.