Pune Woman dies while Zipline in Rajgad Water Park : अटपळकर कुटुंबीय सुट्ट्यांचा आनंद घेण्यासाठी राजगड वॉटर पार्कमध्ये गेले होते. तिथे झिपलाईन करताना तरलचा तोल गेला आणि ती खाली पडली.
अटपळकर कुटुंबीय सुट्ट्यांचा आनंद घेण्यासाठी राजगड वॉटर पार्कमध्ये गेले होते. तिथे झिपलाईन करताना तरलचा तोल गेला आणि ती खाली पडली. तिला तातडीने रुग्णालयात दाखल करण्यात आले, परंतु डॉक्टरांनी तिला मृत घोषित केले. या दुर्घटनेमुळे पार्कमधील सुरक्षा व्यवस्थेवर प्रश्नचिन्ह निर्माण झाले आहे.
तरलचे काका नंदकिशोर श्रीपती अटपळकर (वय 50) यांनी सांगितले की, उन्हाळ्याची सुट्टी असल्याने कुटुंबातील 12 सदस्य राजगड वॉटर पार्कमध्ये मजा करण्यासाठी गेले होते. प्रत्येकी 1200 रुपये प्रवेश शुल्क भरले. दिवसभर खेळ खेळले, जेवण केले आणि सायंकाळी झिपलाईन करण्याचं ठरलं. तरल उत्साहाने झिपलाईन करायला गेली, पण अचानक ती 25-30 फूट उंचीवरुन खाली सिमेंटच्या ब्लॉकवर पडली.
नंदकिशोर पुढे म्हणाले, “पार्कमध्ये सुरक्षा उपाय पुरेसे नव्हते. तांत्रिक अडचणीमुळे किंवा इतर कोणत्याही कारणामुळे अपघात झाल्यास, लोकांना वाचवण्यासाठी जाळी नव्हती. तरलला जेव्हा रुग्णालयात नेले, तेव्हा ती बेशुद्ध होती. डॉक्टरांनी तिला मृत घोषित केले. आम्हाला हे स्वीकारणे खूप कठीण आहे. आम्ही अत्यंत दुःखात आहोत. तरलच्या आजी आणि आईला मोठा धक्का बसला आहे. आम्हाला न्याय हवा आहे, पैशांची भरपाई नको.”
पोलिसांनी या घटनेचा तपास सुरू केला आहे. पुणे ग्रामीणचे पोलीस अधीक्षक पंकज देशमुख म्हणाले, “आमचे पथक राजगड वॉटर पार्कमधील तरुणीच्या मृत्यू प्रकरणाची चौकशी करत आहे. लवकरच अहवाल आल्यानंतर कारवाई सुरू करू. राजगड वॉटर पार्क अँड रिसॉर्ट सध्या बंद ठेवण्यात आले आहे. अशा घटना टाळण्यासाठी योग्य सुरक्षा उपाययोजना करणे आवश्यक आहे.”
Buldhana News : पतीच्या निधनाचा धक्का असह्य, काही तासातच पत्नीनेही प्राण सोडले, एकाच चितेवर अखेरचा निरोप, गावात सगळेच धाय मोकलून रडले
या प्रकरणाचा तपास करणारे सहाय्यक पोलीस निरीक्षक तुकाराम राठोड यांनी सांगितले की, “तरल झिपलाईनवरुन सुमारे 30 फूट खाली पडली. सुरक्षा दोरी व्यवस्थित नसल्यामुळे, ती एका लोखंडी स्टूलवर उभी होती. पण स्टूल स्थिर नसल्याने तिचा तोल गेला आणि ती खाली पडली. तिला तातडीने नास्रापूरमधील सिद्धिविनायक हॉस्पिटलमध्ये दाखल केले, पण डॉक्टरांनी तिला मृत घोषित केले. आम्ही पोस्टमार्टम रिपोर्टची वाट पाहत आहोत. तपास सुरू आहे.”
Pune News : तीन वर्षापूर्वी बाबा गेले, पुण्यात झिपलाईन करताना पडून 28 वर्षीय तरुणीचा मृत्यू, आई-आजी जबर धक्क्यात
Solapur Crime : 25 वर्ष एकत्र काम, ईमेलवरुन धमकी अन्… डॉ. वळसंगकरांनी आयुष्य संपवलं, अटकेतील महिला मनिषा मुसळे-माने कोण?
तरल ही तिच्या कुटुंबातील एकमेव कमावती व्यक्ती होती. तिचे वडील अरुण यांचे तीन वर्षांपूर्वी आजारामुळे निधन झाले होते. तिची आई नंदाताई (वय 59) गृहिणी असून त्या लहान-मोठे टेलरिंगचे काम करून थोडीफार कमाई करतात. तरलचे लग्न डिसेंबरमध्ये करण्याची तिची तयारी सुरू होती. या घटनेमुळे परिसरात हळहळ व्यक्त होत आहे.
लेखकाबद्दलअनिश बेंद्रेमहाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत | सामाजिक, राजकीय आणि मनोरंजनविषयक बातम्यांमध्ये नैपुण्य | क्राईम विषयाचा ‘मास्टरमाईंड’ | एबीपी माझा, टीव्ही९ मराठीसह पत्रकारिता क्षेत्रात 11 वर्षांहून अधिक अनुभव… आणखी वाचा