स्वारगेट आगारात शिवशाही बसमध्ये आरोपी दत्तात्रय रामदास गाडे (वय ३७, रा. गुनाट, शिरूर) याने तरुणीवर दोन वेळा बलात्कार केल्याची घटना २५ फेब्रुवारी रोजी पहाटे पावणेसहा ते पावणेसातच्या दरम्यान घडली होती. गुन्हा केल्यावर पोबारा करून गुनाट गावी शेतात लपून बसलेल्या गाडेला पुणे पोलिसांनी तीन ड्रोन कॅमेरे, श्वान पथक आणि स्थानिक रहिवाशांच्या मदतीने जेरबंद केले. न्यायालयाने आरोपीला १२ दिवस पोलिस कोठडी सुनावली. त्यानंतर आरोपी गाडे येरवडा कारागृहात न्यायालयीन कोठडीत आहे. तपास अधिकारी शैलेश संखे यांच्या पथकाने आरोपी गाडेविरोधात पुरावे गोळा केले. सरकारी वकील भाग्यश्री डागळे-संचेती यांच्यामार्फत आरोपपत्र दाखल करण्यात आले.

तपासातील ठळक मुद्दे

• घटनास्थळावर केस व शर्टाचे बटण सापडले असून, रासायनिक प्रयोगशाळेच्या तपासणीत ते आरोपी गाडेचेच असल्याचे निष्पन्न झाले.
• आरोपी गाडे गुन्ह्याच्या दिवशी स्वारगेट बसस्थानकात पहाटेपासून होता; तसेच तो पीडितेशी बोलत होता, असे पाच प्रत्यक्षदर्शी साक्षीदारांनी पाहिले असून, त्यांचे जबाब न्यायालयात नोंदवण्यात आले आहेत.
• आरोपी गाडे लैंगिकदृष्ट्या सक्षम असल्याचा अहवाल ससून रुग्णालयाच्या तीन तज्ज्ञ डॉक्टरांनी दिला.
• पीडितेने या अत्याचाराबाबत राज्य परिवहन महामंडळाच्या चालक-वाहकांना माहिती देऊन आरोपी गाडेचा शोध घेण्याची विनंती केली होती. या चालक-वाहकांना शोधून पोलिसांनी त्यांचे जबाव न्यायालयात नोंदवले आहेत.
• स्वारगेट एसटी स्थानकातील सीसीटीव्ही चित्रीकरणात आरोपी गाडे घटनास्थळी हजर असल्याचे प्रयोगशाळेच्या अहवालात नमूद आहे.
• आरोपीच्या मोबाइल क्रमांकावरून सायबर तज्ज्ञांमार्फत त्याची गुगल सर्च हिस्टरी तपासली. त्यामध्ये आरोपी गाडे वारंवार अश्लील व्हिडिओ पाहात असल्याचे आढळले. त्यामुळे गुगल सर्च हिस्टरी पंचनामा करण्यात आला.
• ओळख परेडमध्ये पीडित तरुणीने आरोपी गाडेला ओळखले आहे.

प्रथमच केलेले पंचनामे

पोलिसांनी प्रथमच गुन्ह्याच्या तपासात तुलनात्मक ध्वनी तीव्रता पडताळणी पंचनामा केला. त्यामध्ये शिवशाही बसमधून आवाज बाहेर येतो का, याची ध्वनी तंत्रज्ञांमार्फत पडताळणी करण्यात आली; मात्र आवाज बाहेर येत नसल्याचे समजले. गाडेचा फोन अद्याप सापडलेला नाही. त्यामुळे पुणे पोलिसांनी प्रथमच गुगल सर्च हिस्टरी आणि सीसीटीव्ही पंचनामा करून आरोपी गाडे गुन्ह्याच्या वेळी घटनास्थळी हजर असल्याचे शोधून काढले.