साटेली- भेडशी येथील नागेश लाडू मयेकर (वय 40) असं या घटनेत मृत्यू झालेल्या युवकाचं नाव आहे. येथून जवळच असलेल्या गोव्यात तो कामाला होता. सुट्टीसाठी घरी आल्यावरही तो काम करायचा, किरकोळ पैसे मिळवायचा. इतकंच नाही तो आपल्या शेत व बागेतही काम करायचा. असंच काम करत असताना ही दुर्दैवी घटना घडली. नागेशचा मृत्यू झाल्याने मयेकर कुटुंबावर दुःखाचा मोठा डोंगर कोसळला आहे.

लहानपणापासूनच अत्यंत गरिबीत शिक्षण घेतलेल्या नागेशने महाविद्यालय शिक्षणानंतर आपला संसाराचा डोलारा समर्थपणे सांभाळला होता. नेहमी हसतमुख आणि मितभाषी स्वभावामुळे नागेश साटेली – भेडशी व पंचक्रोशीत चांगलाच परिचित होता. महाविद्यालयीन शिक्षण घेत असतानाच त्याने छोटी मोठी कामं करत कुटुंबाला हातभार लावला होता. त्याचा मित्रपरिवारही मोठा होता. महाविद्यालयीन शिक्षणानंतर त्याने सुरुवतीला साटेली भेडशी येथे दुचाकी पायलटिंगचे काम केलं. त्यानंतर त्याने काही काळ पत्रकारिताही केली होती. पदवीपर्यंतचे शिक्षण पूर्ण झाल्यानंतर तो जवळच असलेल्या गोव्यात नोकरीसाठी गेला.

गोव्यातील एका खाजगी कंपनीत तो नोकरीला होता. मात्र सुट्टीसाठी नागेश गावी आला होता. हरहुन्नरी असलेला नागेश सुट्टीवर आल्यानंतरही आपल्या कुटुंबाच्या उदरनिर्वाहासाठी काम करत असे. नागेशच्या या धक्कादायक अपघाती मृत्यूमुळे परिसरातून शोककळा व्यक्त करण्यात येत आहे. घोटगे येथे झाड तोडताना वुड कटर लागून झालेल्या अपघातात पायाच्या मांडीवरील रक्तवाहिनी कापली गेल्याने मोठा रक्तस्त्राव झाला होता. या दुर्दैवी घटनेनंतर त्याला तातडीने साटेली – भेडशी प्राथमिक आरोग्य केंद्रात उपचारासाठी दाखल करण्यात आलं होत मात्र त्यापूर्वीच नागेशने जगाचा निरोप घेतला.
Leopard Attack : आईच्या कुशीत निजलेल्या चिमुकलीला बिबट्याने उचललं, दोन वर्षीय बालिकेचा हृदयद्रावक अंत

कसा झाला अपघात?

मंगळवारी सकाळी तो घोटगे शेतावरील झाड कापण्यासाठी गेला होता. तिथं काम करत असताना ही धक्कादायक घटना घडली होती. झाडाची फांदी कापत असताना ती फांदी तुटल्यावर आडवी आली आणि त्याचबरोबर कटरवरील नियंत्रण सुटल्याने नागेशची मांडी कापली गेली. चालू स्थितीत असलेल्या कटरच्या कापण्याने तो गंभीरित्या जखमी झाला व मोठा रक्तस्त्राव झाला. या अपघातानंतर त्याला तातडीने जवळच्या प्राथमिक रुग्णालयात तातडीने नेण्यात आले, मात्र यापूर्वी त्याचा मृत्यू झाला. त्याला तपासून वैद्यकीय अधिकारी जगदीश पाटील यांनी मृत घोषित केले. नागेशचे वडील पोस्टात कामाला होते, मात्र आई-वडिलांचे यापूर्वीच निधन झाले आहे. त्यानंतर संसाराची सारी जबाबदारी नागेशवरच येऊन पडली होती.
Pune Crime : 36 वर्षीय दाजींनी दोन गोळ्या दिल्या, पुण्यातील 18 वर्षीय मेहुणी बेशुद्ध, अत्याचार करुन अश्लील व्हिडिओ काढले
नागेश परिसरातील सामाजिक कार्यातही अग्रेसर असे मदतशील असा त्याचा स्वभाव होता. परिसरातील अनेक सांस्कृतिक कार्यक्रमांमध्ये ही त्याचा मोठा सक्रिय सहभाग असे. नागेशने घेतलेल्या या अकाली एक्झिटने त्याचा मित्र परिवार व परिसरावर दुःखाचं सावट आहे. कुटुंबावरही मोठा दुःखाचा डोंगर कोसळला आहे. नागेशच्या पश्चात पत्नी, सातवीत शिकणारा मुलगा, एक भाऊ, बहीण, भावजय असा परिवार आहे.