ससून रुग्णालयाच्या पथकाकडून करण्यात आलेल्या तपासात दीनानाथ मंगेशकर रुग्णालय आणि डॉ. सुश्रुत घैसास यांच्यावर कोणताही ठपका ठेवण्यात आला नसल्याची माहिती सूत्रांकडून मिळत आहे. संबंधित वृत्त खरं असेल तर यावरुन पुन्हा विरोधक आक्रमक होण्याची शक्यता आहे. या प्रकरणावरुन दीनानाथ मंगेशकर रुग्णालयावर दबाव वाढल्यानंतर डॉ. सुश्रुत घैसास यांनी राजीनामा दिला होता. पण आता त्यांच्यावर ससून रुग्णालयाच्या अहवाला कोणताही ठपका ठेवण्यात आला नसल्याची माहिती सूत्रांकडून मिळत आहे.

ससूनच्या अहवालात नेमकं काय?

ससून रुग्णालयाच्या अहवालाबाबत गोपनीयता पाळण्यात आली आहे. असं असलं तरी या अहवालातील काही गोष्टी सूत्रांकडून समोर आल्या आहेत. नेमका चुका कोणाकडून झाल्या आहेत? हे देखील स्पष्ट होत नाही. कोणावर कारवाई करावी, काय कारवाई करावी? याबाबत पोलिसांमध्ये संभ्रम आहे. त्यामुळे पोलिसांनी ससून रुग्णालयाच्या पथकाकडे पुन्हा काही मुद्द्यांबाबत अभिप्राय विचारण्यात आल्याची माहिती सूत्रांनी दिली आहे.

ससून रुग्णालयाच्या रिपोर्टमध्ये दीनानाथ मंगेशकर रुग्णालय आणि डॉ. घैसास यांना क्लिनचीट मिळाल्याची माहिती सूत्रांनी दिली आहे. ससून रुग्णालयाच्या पथकाने आपला 6 पानांचा अहवाल पुणे पोलिसांना सादर करण्यात आला आहे. पुणे पोलिसांनी इतर 4 मुद्द्यांवर पुन्हा अभिप्राय मागवल्याची माहिती सूत्रांनी दिली आहे.