कार्ल रॉक हा न्यूझीलंडमधील यूट्यूबर आहे. ज्याने भारतातील प्रवास आणि जीवनशैलीवर आधारित ‘व्हिडिओ’ बनवून खूप लोकप्रियता मिळवली आहे. त्याने २०१३मध्ये पहिल्यांदा भारताला भेट दिली आणि तेव्हापासून तो भारताच्या प्रेमात पडला. त्याने भारतातील सर्व राज्ये आणि केंद्रशासित प्रदेशांना भेटी दिल्या आहेत; तसेच पाकिस्तान आणि बांगलादेशसारख्या शेजारील देशांमध्येही प्रवास केला आहे. त्याचे ‘व्हिडिओ’ प्रामुख्याने परदेशी पर्यटकांसाठी टिप्स, भारतातील घोटाळ्यांपासून कसे वाचावे आणि भारतीय संस्कृती समजून घेण्यास मदत करतात. तो सध्या पुणे दौऱ्यावर आहे.

Pune News : सिंहगडावर परदेशी पर्यटकाला मराठीत शिव्या घालायला लावल्या, तरुणांची टवाळखोरी, शिवप्रेमींचा संताप
अशा प्रकारच्या घटनांमुळे परदेशी पर्यटकांमध्ये गैरसमज निर्माण होण्याची शक्यता असून, राज्याच्या पर्यटन विकासावरही परिणाम होऊ शकतो. सिंहगड हा ऐतिहासिक वारसा असून, तिथे अश्लीलतेचा प्रसार होणे अत्यंत निंदनीय आहे, अशी प्रतिक्रिया अनेक नागरिकांनी व्यक्त केली आहे. महाराष्ट्राच्या अस्मितेला कलंक लावण्याचे काम करणाऱ्या या माथेफिरु तरुणांविषयी संताप व्यक्त केला जात आहे. हवेली पोलिसांनी या प्रकरणी दखल घेतली असून, ‘व्हिडिओ’तील संबंधित तरुणांची ओळख पटवण्याचे काम सुरू असल्याचे सांगण्यात आले. या प्रकारामुळे ‘अतिथी देवो भव’ ही आपल्या संस्कृतीतील शिकवण किती पोकळ झाली आहे,’ ‘ही घटना महाराष्ट्राच्या सुसंस्कृत प्रतिमेला धक्का देणारी आहे’ अशी तीव्र प्रतिक्रिया व्यक्त केली जात आहे.