टेल्को कॉलनीतील घरफोडीप्रकरणी आमोद परांजपे (वय ४३) यांनी तक्रार दिली आहे. त्यावरून आंबेगाव पोलिस ठाण्यात गुन्हा दाखल करण्यात आला आहे. ही घटना मंगळवारी मध्यरात्रीनंतर अडीचच्या सुमारास घडली. पोलिसांनी दिलेल्या माहितीनुसार, परांजपे कुटुंबीय आठ एप्रिलला रात्री सदनिकेच्या दरवाजाला कुलूप लावून बाहेर गेले होते. ते नऊ एप्रिलला सकाळी घरी परतले. त्या वेळी घरफोडीचा प्रकार समोर आला. त्यांनी घरात तपासणी केली असता, ६५ हजार रुपयांची रोकड आणि एक लाख ६१ हजार रुपये किमतीचे सोन्याचे दागिने चोरीला गेल्याचे दिसून आले. याच इमारतीतीत अन्य दोन फ्लॅट चोरट्यांनी फोडले. त्यातील एक सदनिकाधारक परदेशात होते. त्यांच्या घराचा दरवाजा काहींना उघडा दिसल्याने आत पाहिल्यानंतर घरफोडीचा प्रकार उघडकीस आला.

दरम्यान, बाणेर पोलिस ठाण्याच्या हद्दीत पॅनकार्ड क्लब रस्त्यावरील समर्थ कॉलनीत राहणाऱ्या एका ज्येष्ठ नागरिकाच्या घरातून चोरट्यांनी आठ हजार रुपये आणि चांदीच्या वस्तू चोरून नेल्याची घटना घडली. संबंधित ज्येष्ठ नागरिक धार्मिक कार्यासाठी त्यांच्या मूळ गावी गेले होते. त्या वेळी हा प्रकार घडला. विश्रांतवाडी येथील ५७ हजार रुपयांचा मुद्देमाल चोरून नेण्यात आला.

आंबेगाव घरफोडीच्या प्रकारातील ठळक मुद्दे

• घरफोडीच्या ठिकाणचे ‘सीसीटीव्ही’ फुटेज पोलिसांच्या ताव्यात.
• सोसायटीच्या क्लब हाउसच्या मागील बाजूने चार चोरटे आले.
• चोरट्यांनी घरफोडी करताना अन्य सदनिकांना बाहेरून कड्या लावल्या.
• पावलांचा आवाज येऊ नये म्हणून काही चोरट्यांनी चपला हातात घेतल्या
• प्रत्येकाने तोंडाला रुमाल, मास्क लावला होता. तर, हातात ग्लोज घातलेले होते.

रेकी करूनच शिरकाव

आंबेगाव येथील साईदत्त निवास टेल्को कॉलनीत तीन इमारती आहेत. त्यातील एका इमारतीत वन बीएचके सदनिका असून, बऱ्यापैकी सर्व सदनिकांत लोक राहतात. उर्वरित दोन इमारतीत टू-बीएचके सदनिका आहेत. यात काही सदनिका बंद होत्या. या इमारतीमध्ये चोरट्यांनी शिरकाव केला होता. त्यावरून चोरट्यांनी घरफोडीपूर्वी रेकी केरली असण्याची शक्यता आहे.