महाराष्ट्र गृहनिर्माण व क्षेत्र विकास प्राधिकरणाने (म्हाडा) २०२५-२६च्या अर्थसंकल्पात राज्यभरात १९,४९७ घरांचे उद्दिष्ट ठेवले आहे. त्यात मुंबईतील ५,१९९ घरांचा समावेश आहे ज्यासाठी ५७४९.४९ कोटी रुपये तरतूद करण्यात आली आहे. विविध शहरांतल्या पुनर्विकास योजना आणि निवास प्रकल्पांसाठी एकूण १५,९६५.९२ कोटी रुपये मंजूर झाले आहेत.
म्हाडाच्या अर्थसंकल्पात कोकण मंडळातंर्गत ९९०२, मुंबई मंडळातंर्गत ५,१९९, पुण्यात १,८३६, नागपूरमध्ये ६९२, छत्रपती संभाजीनगरमध्ये १,६०८, नाशिकमध्ये ९१, अमरावतीमध्ये १६९ घरे बांधण्याचे उद्दिष्ट ठेवण्यात आले आहे. त्यात, मुंबईतील घरांसाठी ५७४९.४९ कोटी रुपये, कोकणातील घरांसाठी १४०८.८५ कोटी रुपयांची तरतूद करण्यात आली आहे. पुण्यातील घरांसाठी ५८५ कोटी रुपये, नागपूरमधील घरांसाठी १००९ कोटी रुपये, छत्रपती संभाजीनगरमधील घरांसाठी २३१ कोटी रुपये, नाशिकमधील घरांसाठी ८६ कोटी रुपये, अमरावतीमधील घरांसाठी ६५.९६ कोटी रुपयांची तरतूद करण्यात आली आहे.
मुंबईतील पुनर्विकास योजनेसाठी २,८०० कोटी
मुंबई मंडळातर्फे अर्थसंकल्पात वरळी, नायगाव, परळ बीडीडी चाळींच्या पुनर्विकास योजनेसाठी २८०० कोटी रुपयांची तरतूद करण्यात आली आहे. जोगेश्वरी पूर्वेतील पीएमजीपी कॉलनी पुनर्विकास प्रकल्पासाठी ३५० कोटी रुपये, वांद्रे पश्चिमेतील परिध खाडी पुनर्विकास प्रकल्पासाठी २०५ कोटी रुपये, गोरेगाव सिद्धार्थनगर येथे घरे उभारणीसाठी ५७३ कोटी रुपयांच्या तरतुदीचा त्यात समावेश आहे. परळ येथील जिजामाता नगर येथील भूखंडावर मुले व मुलींच्या वसतिगृह उभारणीसाठी २० कोटी रुपये, गिरणी कामगारांच्या घरासाठी ५७.५० कोटी रुपये, बोरिवली सर्वे क्र. १६०मधील योजनेसाठी २०० कोटी., संजय गांधी राष्ट्रीय उद्यानामधील पुनर्वसन प्रकल्पासाठी २०० कोटी, पहाडी गोरेगाव प्रकल्पासाठी १७७.७९ कोटी, मालवणी झोपडपट्टी सुधार प्रकल्पासाठी ५० कोटी, मागाठाणे बोरिवली योजनेसाठी ८५ कोटी, एक्सर बोरिवली तटरक्षक दल योजनेसाठी ३० कोटी, गोरेगाव सिद्धधार्थ नगर (पत्राचाळ) पुनर्विकास प्रकल्पासाठी २० कोटी रुपयांची तरतूद करण्यात आली आहे.
मुंबईकरांच्या खिशाला लागणार कात्री, महापालिकेचा कचराकराबाबत मोठा निर्णय, आता प्रत्येक घराला…
कोकण मंडळांतर्गत पाचपाखाडी-ठाणे सावरकर नगर येथे दोन मजल्यांचे हेल्थ केअर सेंटर, निवासी घरकुल योजनेसाठी १५ कोटी रुपये, माजिवडा-ठाणे विवेकानंद नगर येथे १०० खाटांचे वृद्धाश्रम व काम करणाऱ्या महिलांसाठी वसतिगृह उभारणीसाठी ३० कोटी रुपये, विरार बोळींज येथे क्लब हाऊस, जलतरण तलाव व भूखंड विकसित करण्यासाठी ३३.८५ कोटी रुपये, वर्तकनगर-ठाणे पोलिस वसाहत इमारतींच्या पुनर्विकास कामासाठी ९० कोटी रुपये, गोठेघर प्रधानमंत्री आवास योजना (शहरी) योजनेसाठी ११५ कोटी रुपये अर्थसंकल्पात तरतूद करण्यात आली आहे. नागपूर मंडळातंर्गत चंद्रपूर विशेष नियोजन प्राधिकरण योजनेसाठी ३७१ कोटी रुपये, टेक्सटाइल पार्क एम्प्रेस मिल योजनेसाठी ३५० कोटी रुपयांची तरतूद करण्यात आली आहे.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा