संतोष आण्णा दर वेळेस तुम्ही मोठ्या उत्सहात आमच्या सोबत ईद साजरी करत होतात. आणि तुम्ही या वर्षी हॉल मध्ये मोठी ईद साजरी करायची इच्छा देखील व्यक्त केली होती. दुदैवाने आज तुम्ही आमच्यात नाहीत याचा आम्हाला फार दुःख आहे, म्हणुन तुमच्या सर्व मुस्लिम बांधवानी ईद न साजरी करण्याचा निर्णय घेतला आहे. हे शब्द आहेत मस्साजोगमधील दुखांकित समस्त मुस्लिम बांधवांचे… देशासह राज्यभरात रमजान ईदचा उत्साह असताना सरपंच संतोष देशमुख यांच्या मस्साजोग गावात मुस्लिम बांधवांनी ईद साजरी न करण्याचा निर्णय घेतला. गावासाठी लढणारा, गावच्या भल्यासाठी निर्णय घेणारा, कधीही जातधर्म न पाहता सगळ्यांचे हित डोळ्यासमोर ठेवणारा संतोष अण्णा आज आपल्यात नाहीत… पुढच्या वेळी दणक्यात ईद साजरी करू अण्णा म्हणालेले… असं सांगत मुस्लिम बांधव धनंजय देशमुखांसमोर ढसाढसा रडले… प्रत्येक रमजान ईदला सरपंच या नात्याने संतोष देशमुख प्रत्येक मुस्लिम बांधवांच्या घरी जाऊन त्यांना शुभेच्छा द्यायचे. त्यांच्यासोबत अल्पोपहार करायचे. परंतु यंदा सरपंच हयात नसल्याने त्यांचे बंधू धनंजय देशमुख यांनी रमजानदिनी मुस्लिम बांधवांच्या भेटी घेऊन त्यांना शुभेच्छा दिल्या…..