Eknath Shinde VS Uddhav Thackeray : उपमुख्यमंत्री एकनाथ शिंदे यांनी पुन्हा एकदा उद्धव ठाकरे यांना धक्का दिला आहे. ठाकरे गटाच्या नंदूरबारच्या जिल्हाप्रमुखाने शिंदे गटात प्रवेश केल्यानंतर दुसऱ्यादिवशीदेखील शिंदे गटाने पुण्यात ठाकरे गटाला धक्का दिला आहे.
मागील महिन्यामध्ये ठाकरे गटातील 5 माजी नगरसेवकांनी भाजपात प्रवेश केला होता. हा मोठा धक्का ठाकरे गटाला बसला होता. या धक्क्यातून ठाकरे गट बाहेर पडत नाही. तोवर ठाकरे गटाचे उपशहरप्रमुख आनंद गोयल यांनी शिंदे गटात पक्ष प्रवेश केला आहे. यामुळे ठाकरे गटाला मोठा धक्का मानला जात आहे.
‘कामाचं कौतुक नाही, शहराकडे दुर्लक्ष यामुळे पक्ष सोडतोय’
या पक्ष प्रवेशाबाबत आनंद गोयल यांनी ‘महाराष्ट्र टाइम्स ऑनलाईन’ला प्रतिक्रिया दिली. “मागील आठ वर्षांपासून शिवसेना उद्धव बाळासाहेब ठाकरे पक्षात काम करीत आलो, एक शिवसैनिक ते उपशहरप्रमुख पदापर्यंत माझा प्रवास राहिला. या संपूर्ण कालावधीत पक्षाकडून देण्यात आलेली प्रत्येक जबाबदारी चांगल्याप्रकारे पार पाडत राहिलो, असं आनंद गोयल म्हणाले.
“पक्षातील वरीष्ठ नेत्यांचं पुणे शहराकडे कायम दुर्लक्ष राहिले. यामुळे विकासकामे होऊ शकली नाही. तसेच कार्यकर्त्यांनी केलेल्या कामांचं कधीही कौतुक केले नाही. त्यामुळे या सर्व गोष्टी लक्षात घेऊन विकास कामांच्या दृष्टीने उपमुख्यमंत्री एकनाथ शिंदे यांच्या उपस्थितीत आज प्रवेश केला. शहरात आणखी जोमाने काम करून शिवसेना शेवटच्या व्यक्तीपर्यंत पोहोचवणार”, अशी प्रतिक्रिया आनंद गोयल यांनी दिली.