राष्ट्रवादी काँग्रेस पवार गटाचे शहराध्यक्ष प्रशांत जगताप यांनी या संदर्भातील दोन व्हिडिओ सोशल मीडियावर शेअर केले आहेत. पहिला व्हिडिओ अलका चौकातील असून त्यामध्ये अॅम्ब्युलन्स ट्राफिकमध्ये अडकलेली दिसते, तर दुसऱ्या व्हिडिओमध्ये विद्यापीठ चौकात मोठी वाहतूक कोंडी झालेली पाहायला मिळते.

प्रशांत जगताप यांनी काय म्हटले?

“२०१४ मध्ये सत्तेत आल्यानंतर पंतप्रधान नरेंद्र मोदी यांनी महाराष्ट्र आणि देशातील जनतेला मूर्ख बनवण्याचे काम केले. ‘व्हीआयपी संस्कृती बंद करतो’ अशी मोठी घोषणा त्यांनी केली होती. २०१६ मध्ये लाल दिव्याच्या गाड्या बंद केल्या, मात्र प्रत्यक्षात व्हीआयपी कल्चर अजूनही संपलेले नाही.” असं प्रशांत जगताप यांनी म्हटलं आहे.

“मुख्यमंत्री देवेंद्र फडणवीस यांच्या पुणे दौऱ्यामुळे शहरात मोठी वाहतूक कोंडी झाली. आमचा व्हीआयपी कल्चरला विरोध नाही, पण यामुळे सामान्य नागरिकांचा जीव धोक्यात येऊ नये, एवढीच अपेक्षा आहे,” असे जगताप यांनी म्हटले.

राष्ट्रवादी काँग्रेस शरदचंद्र पवार पक्षाने या घटनेवर तीव्र नाराजी व्यक्त केली असून, वाहतूक कोंडीसाठी प्रशासन आणि सरकारला जबाबदार धरले आहे. आता राज्य सरकार यावर काय स्पष्टीकरण देते, याकडे लक्ष लागले आहे.

दरम्यान, मुख्यमंत्री देवेंद्र फडणवीस काल पुणे दौऱ्यावर होते. २०२१-२२ वगळता दरवर्षी देशात सर्वाधिक परकीय गुंतवणूक महाराष्ट्रात होतेय. यंदाच्या तिमाही अहवालातही औद्योगिक गुंतवणुकीत महाराष्ट्र आघाडीवर असून देशाची अर्थव्यवस्था पाच ट्रिलियनकडे वाटचाल करत आहे, तर महाराष्ट्राची अर्थव्यवस्था २०२९ मध्ये एक ट्रिलियनवर नेण्यासाठी प्रयत्न सुरु असल्याचे फडणवीस यांनी सांगितले.