कुणाल कामरा (Kunal Kamra) आणि वाद हे काही नवीन नाही. त्याचं दीर्घकाळापासून वादांशी संबंध आहे. यापूर्वीही अनेकवेळा तो वादाच्या भोवऱ्यात सापडला आहे. यामुळे एकदा त्याच्यावर विमान कंपनीने बंदीही घातली होती.

मुंबईत कॉमेडियन कुणाल कामराच्या स्टँडअप शोनंतर एकच गोंधळ माजला. त्यांच्या उपमुख्यमंत्री एकनाथ शिंदे यांच्यावरील कवितेमुळे हा वाद निर्माण झाला. एकीकडे उद्धव ठाकरे यांची शिवसेना त्यांना समर्थन देत आहे. तर, एकनाथ शिंदे गट मात्र अत्यंत नाराज आहे. शिवसेनेकडून कुणाल कामराला धमकीही देण्यात आली आहे. ठाण्याचे खासदार नरेश म्हस्के यांनी त्याला भाड्याने घेतलेला कॉमेडियन म्हटलं आहे. कुणाल कामराने आपल्या शोदरम्यान एक कविता ऐकवली, त्यात त्याने एकनाथ शिंदे यांना गद्दार म्हटलं होतं आणि महाराष्ट्राच्या राजकारणावर ताशेरे ओढले होते. त्यानंतर हा वाद सुरु झाला होता.

कुणाल कामरा आणि वाद

कुणाल कामराचा यापूर्वीही अनेक वादांशी संबंध राहिलेला आहे. २०२० मध्ये कुणाल कामरा याच्यावर इंडिगो आणि स्पाइसजेटसह ४ विमान कंपन्यांनी बंदी घातली होती. त्यावेळी त्याच्यावर मुंबई ते लखनौच्या फ्लाइटमध्ये पत्रकार अर्णब गोस्वामी यांना त्रास दिल्याचा आरोप होता, त्यानंतर इंडिगोने त्यांच्यावर ६ महिन्यांची बंदी घातली होती.

सर्वोच्च न्यायालयाबाबतही अनेक वादग्रस्त कमेंट

कुणाल कामराने २०२० मध्ये सर्वोच्च न्यायालयाबाबत अनेक वादग्रस्त कमेंट केल्या होत्या. त्यांच्या एका ट्विटमध्ये त्याने सर्वोच्च न्यायालयाच्या मुख्य इमारतीवरील राष्ट्रध्वजाच्या जागी भाजपचा झेंडा लावला होता. याशिवाय, सर्वोच्च न्यायालयाचे माजी न्यायाधीश डीव्हाय चंद्रचूड यांच्याबद्दलही त्याने अपमानजनक टिप्पणी केली होती. याशिवाय, कामरा नेहमी हिंदुत्व आणि राष्ट्रवादावर भाष्य करत असतो, त्यामुळे तो वादात सापडतो.

कुणाल कामरा पहिल्यांदा त्याच्या ‘शतप या कुणाल’ या शोमधून लोकप्रिय झाला होता. २०१७ मध्ये त्याने असदुद्दीन ओवेसी, कन्हैया कुमार, अरविंद केजरीवाल, रवीश कुमार, ओमर खालिद आणि शेहला रशीद यांसारख्या अनेक लोकांच्या मुलाखती घेतल्या होत्या.

सध्या पोलिसांनी कुणाल कामरावर गुन्हा दाखल केला असून त्याचा शोध सुरु आहे, लवकरच पोलीस त्याला ताब्यात घेणार असल्याची माहिती आहे. तर, तोडफोड प्रकरणी शिवसेना पदाधिकाऱ्यांनाही ताब्यात घेण्यात आलं आहे.