Flight Tickets Hike: सुट्ट्यांचा हंगाम सुरू होत असताना, उन्हाळी पर्यटनाला जाण्यासाठी तिकिटांचे दरदेखील कडाडले आहेत. विशेषतः हिमालयीन पर्यटनासाठी जायचे असल्यास एप्रिल व मे, अशा पुढील दोन्ही महिनाभर तिकीट दर खूप महाग आहेत.
एप्रिल ते जूनच्या मध्यापर्यंत देशात पर्यटनाचा कालावधी असतो. हे पर्यटन शहरी, थंड हवेच्या ठिकाणी, समुद्रकिनारी असते. अयोध्येतील राम मंदिरासारख्या स्थळांमुळे हे पर्यटन धार्मिक व आध्यात्मिकदेखील होऊ लागले आहे. त्यातच मागील काही वर्षांत पर्यटनाला जाण्यासाठी विमान प्रवासाकडे नागरिकांचा कल वाढला आहे. त्यामुळेच मे हा हवाई क्षेत्रासाठी वर्षभरातील सर्वाधिक प्रवासी असलेला महिना ठरत आहे. त्यामुळे नेमक्या उन्हाळ्यातच विमान प्रवास महागला आहे.
Devendra Fadnavis: राज्यात लवकरच आर्थिक गुप्तचर शाखा; मुख्यमंत्री फडणवीसांची विधानसभेत घोषणा
मुंबईत आता ऊन तापू लागले असून, पुढील दोन महिन्यांत आणखी उकाडा वाढण्याची चिन्हे आहेत. यामुळेच मुंबईकर या काळात थंड हवेच्या ठिकाणी पर्यटनाला जाण्यास प्राधान्य देतात. या काळात देशभरात केवळ हिमालयीन परिसर हा सर्वाधिक थंड असतो. त्यामुळेच तिकडे जाणाऱ्यांचा ओढा वाढता आहे. हिमाचल प्रदेश, उत्तराखंड, लेह-लडाख, काश्मीर ही या काळातील पर्यटन ठिकाणे आहेत. मात्र, तिकडे हवाई मार्गाखेरीज रेल्वेने किंवा अन्य वाहनाने पोहोचण्यात ३० तासांहून अधिक कालावधी लागतो. यामुळे पर्यटक विमानप्रवासाचा पर्याय निवडतात. त्यातूनच मागणी व परिणामी तिकीटदरदेखील वधारत असल्याचे सहल व्यवस्थापक नितीन माहेश्वरी यांनी सांगितले. 
दंगलीमागचा सूत्रधार शोधून काढू! पालकमंत्री बावनकुळेंची ग्वाही; जखमींची घेतली भेट
या पार्श्वभूमीवर मुंबईहून श्रीनगर किंवा लेहला विमानाने जायचे असल्यास त्यासाठी अनुक्रमे १२ ते १४ हजार व १४ ते १७ हजार रुपये खर्च करावे लागणार आहेत. उत्तराखंडमधील नैनीतालसह अन्य थंड हवेच्या ठिकाणी जाण्यासाठी देहराडून हे जवळचे विमानतळ आहे. त्यामुळे त्याचे तिकीटदेखील एरव्हीच्या सहा हजार रुपयांऐवजी ११ हजार रुपयांच्या घरात गेले आहे. पश्चिम बंगालमधील दार्जिलिंगला जाण्यासाठी बागडोगरा विमानतळावर उतरावे लागते. त्यामुळे मुंबई-बागडोगरा विमानाचे तिकीट इतर वेळच्या पाच हजार रुपयांऐवजी आता नऊ हजार रुपयांच्यावर गेले आहे.
हिमाचल प्रदेशातील डलहौसी, शिमला, कुलू, मनाली अशा थंड हवेच्या पर्यटनासाठी धर्मशाळा हे एकमेव विमानतळ हिमाचल प्रदेशात आहे. तेथे पोहोचण्यासाठीदेखील १४ हजार रुपयांचे तिकीट काढावे लागणार आहे.
शेतकरी कवटाळतोय मृत्यूला; यवतमाळमध्ये १०० दिवसांत ८८, तर २५ वर्षांत ‘इतक्या’ जणांनी संपवलं जीवन
चंडिगडला वाढती मागणी
चंडिगडमध्ये उन्हाळा खूप असतो. मात्र ते ठिकाण हिमाचल प्रदेशसाठीचा प्रमुख तळ आहे. तेथून हिमाचल प्रदेशात किंवा पंजाब फिरून पुढे काश्मिरातदेखील जाणे शक्य असते. मुंबईहून धर्मशाळाचे तिकीट महाग असल्याने अनेक जण चंडिगडपर्यंत विमान प्रवास करून पुढे रस्तेमार्गे हिमाचल प्रदेश गाठतात. त्यामुळेच आगामी पर्यटन काळात मुंबई-चंडिगड विमान तिकीटदरात वाढ झाल्याचे दिसून येत आहे.
मुंबईहून प्रमुख मार्गांचे तिकीटदर
शहर –पुढील दोन महिने –इतरवेळी
श्रीनगर —१२ ते १४ हजार रु. ६ ते ७ हजार रु.
लेह —१४ ते १७ हजार रु. ८ ते १० हजार रु.
डेहराडून —९ ते ११ हजार रु. ५ ते ६ हजार रु.
चंदीगड —१२ ते १४ हजार रु. ६ ते ७ हजार रु.
बागडोगरा —९ ते ११ हजार रु. ५ ते ६ हजार रु
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाइनमध्ये कन्सल्टंट म्हणून कार्यरत असून पत्रकारितेमध्ये पदव्युत्तर शिक्षण पूर्ण केले आहे. ऑनलाइन माध्यमांमध्ये फ्रीलान्सिंगचा २ वर्षांचा अनुभव आहे आणि आता मटा ऑनलाइनमध्ये आहे. जनरल बातम्यासोबतच गुन्हेगारीविषयक बातम्यांमध्ये रस.… आणखी वाचा