हिंजवडी फेज १ येथे मंगळवारी (१९ मार्च) सकाळी व्योमा ग्राफिक्स कंपनीच्या या बसला भीषण आग लागली. यामध्ये चार जणांचा होरपळून मृत्यू झाला आहे. तर पाच जण जखमी झालेत. यापैकी दोघे हे ४० टक्के भाजले गेले आहेत. हिंजवडी पोलीस ठाण्याचे वरिष्ठ पोलीस निरीक्षक कन्हैया थोरात यांनी दिलेल्या माहितीनुसार सकाळी साडेसातच्या सुमारास एचआयए कार्यालयाजवळ ही आग लागल्याची माहिती आहे.

व्योमा ग्राफिक्स कंपनीच्या १२ ते १५ कर्मचाऱ्यांची वाहतूक करणाऱ्या या टेम्पो ट्रॅव्हलर बसच्या इंजिनमध्ये बिघाड झाला आणि त्यामुळे ही भीषण आग लागल्याची माहिती समोर आली आहे. आग लागताच समोरच्या भागात बसलेले कर्मचारी हे वेळीच बाहेर पडू शकल्याने त्यांच्या जीव वाचला आहे. मात्र, यापैकी चार जणांना आपला जीव गमवावा लागला आहे. या घटनेत पाच जण जखमी झाले आहेत. जखमींवर सध्या हिंजवडी येथील रुबी हॉल क्लिनिकमध्ये उपचार सुरू आहेत. गंभीर जखमींमध्ये चालकाचा समावेश असल्याची माहिती आहे.

या मिनी बसला लागलेली आग विझवण्यात अग्निशमन दलाला यश आले आहे. मात्र, ही आग कशामुळे लागली याचं कारण अद्याप समोर आलेलं नाही. याबाबत अधिक माहितीसाठी आम्ही महाराष्ट्र औद्योगिक विकास महामंडळ (MIDC) आणि पुणे महानगर प्रदेश विकास प्राधिकरण (PMRDA) च्या अधिकाऱ्यांशी संपर्क साधण्याचा प्रयत्न केला, पण सध्या काहीही माहिती मिळू शकलेली नाही.