यकृत प्रत्यारोपण आणि एचपीबी सर्जरी विभागाचे प्रमुख डॉ. विक्रम राऊत यांच्या नेतृत्वाखाली ही शस्त्रक्रिया करण्यात आली. सुरेश यांना, पाच महिन्यांपूर्वी पोटात द्राव जमा होत होता आणि सूज येत असल्याचे निदान झाले होते. यासाठी यकृत प्रत्यारोपणाचा सल्ला त्यांना देण्यात आला होता. ते केले तरच निकामी होणारे यकृत वाचवता येणे शक्य होते. या आजारामध्ये रोगप्रतिकारशक्ती कमी होते. त्यामुळे संबंधित अवयव निकामी होतो. सुरेश यांना मधुमेह वगळता अन्य कोणताही त्रास नव्हता. केवळ त्यांच्या पायाला

सूज आली होती. मधुमेहामुळे ही सूज आल्याचे त्यांना वाटले. डॉक्टरांकडून तपासणी करून घेण्याचा आग्रह कुटुंबीयांनी करूनही सुरेश यांनी त्याकडे लक्ष दिले नाही. तीन जणांच्या कुटुंबामध्ये ते एकटेच कमावते असल्याने त्यांनी स्वतःच्या प्रकृतीकडे विशेष लक्ष दिले नाही. दरम्यान, यकृत निकामी झाल्याचे निदान होण्यापूर्वीच तशी गरज लागली, तर वडिलांना यकृतदान करण्याचा निर्णय त्यांच्या मुलीने घेतला होता.

डॉ. राऊत म्हणाले, ‘पूर्ण तपासणीअंती सुरेश यांच्यामध्ये ऑटोइम्यून मार्कर वाढलेले आढळले. ऑटोइम्यून स्थितीत रुग्णाची रोगप्रतिकारक क्षमता बिघडते आणि त्यांच्या स्वतःच्या यकृत पेशींवर हल्ला करते. बऱ्याचदा वर्षानुवर्षे या स्थितीचा अंदाज येत नाही. योग्य वेळेत निदान झाल्यास औषधोपचाराने हा आजार बरा करता येतो. सुरेश यांचा आजार आधीच गंभीर स्थितीत असल्याने त्यांना अवयव प्रत्यारोपणाची गरज होती. या मुलीने घेतलेल्या धाडसी निर्णयामुळे यकृत दानाबद्दल जागरूकता निर्माण होईल, अशी आशा त्यांनी व्यक्त केली