राज्यातील शाळांमध्ये इयत्ता पहिली ते नववी वर्गाच्या परीक्षा साधारणपणे मार्चअखेरीस किंवा एप्रिल महिन्यात शाळास्तरावरून घेण्यात येतात. एप्रिल महिन्याच्या सुरुवातीलाच वार्षिक परीक्षा पूर्ण झाल्यास त्यानंतरच्या कालावधीत शाळा सुरू असल्या, तरी विद्यार्थ्यांची पुरेशी उपस्थिती नसते. अशा पद्धतीने परीक्षांचे आयोजन वर्ष अखेर करण्याऐवजी लवकर केल्यामुळे विद्यार्थ्यांना अध्ययनासाठी मिळणारा कालावधी कमी होतो. प्रत्येक शाळेचे वेळापत्रक वेगवेगळे असल्याचे निदर्शनास आले आहे. त्यामुळे राज्यातील सर्व शाळांमध्ये एकवाक्यता असावी आणि उपलब्ध वेळेचा उपयोग विद्यार्थ्यांच्या अध्ययनासाठी व्हावा, यासाठी राज्यातील शाळांमध्ये वर्ष खेरीस घेण्यात येणारे मूल्यमापन एप्रिल महिन्याच्या उत्तरार्धात करण्याचे विचाराधीन आहे.

इयत्ता तिसरी ते नववीच्या विद्यार्थ्यांसाठी नियतकालिक मूल्यांकन चाचण्यांचे आयोजन करण्यात येत आहे. त्याला अनुसरून सन २०२४-२५ या शैक्षणिक वर्षात पायाभूत चाचणी, संकलित मूल्यमापन चाचणी एक आणि दोन अशा तीन चाचण्यांचे आयोजन करण्यात येणार आहे. चालू शैक्षणिक वर्षात राज्यातील सर्व माध्यम आणि सर्व व्यवस्थापनाच्या शाळांमध्ये इयत्ता पहिली ते नववीच्या वार्षिक परीक्षांचा कालावधी समान ठेवण्यास सूचना प्रसिद्ध केल्या आहेत.

सर्वसाधारण सूचना काय आहेत?

• संकलित मूल्यमापन दोन’साठी परीक्षांचे आयोजन शाळा स्तरावरून करण्यात येईल. त्यासाठी प्रसिद्ध केलेल्या वेळापत्रकाचा वापर करावा.
• शासकीय, स्थानिक स्वराज्य संस्था तसेच खासगी अनुदानित शाळांतर्गत इयत्ता तिसरी ते नववीसाठी प्रथम भाषा, गणित आणि इंग्रजी या विषयांसाठी संकलित मूल्यमापन दोनच्या प्रश्नपत्रिका राज्य शैक्षणिक संशोधन व प्रशिक्षण परिषद (एससीईआरटी) या कार्यालयाकडून पुरविण्यात येतील. इतर व्यवस्थापनाच्या शाळा प्रश्नपत्रिका शाळास्तरावर तयार करतील.
• इयत्ता पहिली, दुसरीसाठी सर्व विषयांच्या आणि तिसरी ते नववी अन्य विषयांच्या संकलित चाचणी दोन / लेखी परीक्षेच्या प्रश्नपत्रिका शाळा स्तरावर विकसित करून प्रचलित पद्धतीनुसार मूल्यमापन करावे.
• कलाशिक्षण, कार्यानुभव, शारीरिक शिक्षण आदी श्रेणी विषयांच्या मूल्यमापनाचे नियोजन शाळास्तरावर करावे.
• या सूचना राज्य मंडळाव्यतिरिक्त अन्य मंडळांना लागू नाहीत.
• अपवादात्मक किंवा स्थानिक परिस्थिती लक्षात घेऊन काही बदलांसाठी शिक्षणाधिकाऱ्यांनी ‘एससीईआरटी’ची परवानगी घ्यावी.