Pune Swargate Rape Case Updates : स्वारगेट येथे २५ फेब्रुवारीला शिवशाही बसमध्ये झालेल्या बलात्कार प्रकरणात आरोपी दत्तात्रय गाडे याचा मोबाइल शोधण्यासाठी पुणे पोलिसांचे पथक गुनाटमधील शेतात जाणार आहे. या मोबाइलमधून अधिक महत्त्वाचे पुरावे मिळू शकतात. गाडे याला अटक करण्यात आलेली असून त्याची पोलिस कोठडी १२ मार्चपर्यंत वाढवण्यात आली आहे.
या प्रकरणाचा तपास वेगाने सुरू असून, आरोपीचा मोबाइल मिळाल्यास गुन्ह्याशी संबंधित महत्त्वाची माहिती मिळण्याची शक्यता आहे. दरम्यान, आरोपीने मोबाइल फेकल्याचा दावा खरा आहे की, तो पोलिसांना दिशाभूल करत आहे, हे लवकरच स्पष्ट होईल. पोलिसांकडून आरोपीच्या संपर्कातील इतर लोकांचीही चौकशी करण्यात आली आहे. या गुन्ह्यात आणखी कोणाचा सहभाग आहे का, याचा तपास सुरू आहे.
मोबाइलचा शोध पोलिसांसाठी महत्त्वाचा का?
आरोपीच्या मोबाइलमध्ये गुन्ह्याशी संबंधित काही महत्त्वाचे पुरावे असू शकतात. मोबाइलमधील कॉल रेकॉर्ड, मेसेज, लोकेशन डेटा आणि इतर डिजिटल माहितीमुळे आरोपीच्या हालचालींबाबत अधिक माहिती मिळू शकते. त्यामुळे पोलिस आता आरोपीच्या मोबाइलचा शोध घेण्यावर भर देत आहेत. यासाठी सर्वत्र शोध सुरू आहे.
आरोपी कोठडीत; तपास सुरू
गाडे याला अटक केल्यानंतर पोलिसांनी त्याची चौकशी सुरू केली असून, गुन्ह्यातील आणखी काही धागेदोरे हाती लागण्याची शक्यता आहे. न्यायालयाने त्याला १२ मार्चपर्यंत पोलिस कोठडी सुनावल्याने तो पोलिसांच्याच ताब्यात असून, चौकशीसाठी आणखी वेळ पोलिसांच्या हाती आहे, असे सांगण्यात आले.
आरोपपत्राची तयारी
पुणे पोलिसांनी या प्रकरणात आत्तापर्यंत समाधानकारक तपास केला आहे. घटनेच्या दिवसापासून आत्तापर्यंत केलेला तपास आणि हाती लागलेले पुरावे याच्या आधारावर आरोपीविरोधात आरोपपत्र तयार करण्याचे कामही सुरू करण्यात आले आहे, अशी माहिती गुन्हे शाखेचे अतिरिक्त आयुक्त शैलेश बलकवडे यांनी दिली.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा