बारामती तालुक्यातील डोर्लेवाडी येथे २७ फेब्रुवारी रोजी ही घटना घडली. पीडित मुलाची आजी त्याला भेटण्यासाठी गेली असताना हा प्रकार उघड झाला. आजीने याप्रकरणी फिर्याद दिली. आजी भेटण्यासाठी गेली असताना नातू तिच्यासमोर जोरजोरात रडू लागला. आजीने त्याला विश्वासात घेवून त्याच्याकडे विचारपूस केली असता त्याने ही घटना सांगितली. संबंधित आरोपीच्या मुलीसोबत हा अल्पवयीन मुलगा एका अंथरुणात झोपलेले आरोपीला आढळून आले. त्यामुळे त्याने या मुलाच्या पाठीवर, पोटावर, उजव्या बाजुस व डाव्या हाताचे दंडावर मोबाईलच्या चार्जरचे वायरने मारहाण केली. तसेच त्याच्या जनेंद्रीयावर लाल तिखट लावले तसेच त्याला एक चमचा लाला तिखट खाण्यास दिले. आजीने पोलिसांत धाव घेतली. पोलिसांनी संबंधित मुलाची वैद्यकीय तपासणी केली. त्यानंतर पोलिसांनी आरोपीविरोधात गुन्हा दाखल केला.

परस्परविरोधी फिर्यादी; नऊ जणांविरोधात गुन्हा

बारामती शहरातील प्रगतीनगर भागात किरकोळ कारणावरून दोन कुटुंबात जोरदार हाणामारी झाली. याप्रकरणी शहर पोलिस ठाण्यात परस्परविरोधी फिर्यादी दाखल झाल्या असून पोलिसांनी दोन्ही बाजूच्या नऊ जणांविरोधात गुन्हा दाखल केला. प्रिया सुहास गावडे (रा. इंगोले गार्डन, प्रगतीनगर) यांनी दिलेल्या फिर्यादीवरून राकेश सूर्यवंशी, पूजा राकेश सूर्यवंशी, पूजा यांचे काका व भाऊ निलाखे (पूर्ण नावे, पत्ता नाहीत) या चौघांविरोधात गुन्हा दाखल करण्यात आला. रविवारी (दि. २) सकाळी आठ वाजता ही घटना घडली. फिर्यादी पती सुहास, दोन्ही मुले, नणंद सुप्रिया गावडे, दीर सूरज गावडे, नातेवाईक विजय सांगळे यांच्यासह घरी होत्या. त्यांचा मुलगा स्वयम हा दहावीच्या परीक्षेचा अभ्यास करत होता. त्या वेळी सूर्यवंशी यांचा मुलगा देवांश हा रडत होता. त्यामुळे अभ्यासात व्यत्यय येत असल्याने फिर्यादीने देवांश याला रडू नको असे सांगितले. त्यावर राकेश सूर्यवंशी यांनी तुम्हाला लय माज आला आहे का, खाली या तुमचा माज उतरवतो अशी भाषा वापरली. त्यामुळे फिर्यादीच्या पतीने महिलांशी या पद्धतीने बोलतात का अशी विचारणा केली असता त्यांनी सुहास गावडे यांना हाताने, लाथाबुक्क्यांनी मारहाण करत शिवीगाळ केली. भांडण सोडविण्यासाठी आलेल्या सूरज गावडे, विजय सांगळे यांनाही शिवीगाळ, दमदाटी करून जिवे मारण्याची धमकी दिली. सूरज यांचा मोबाईल राकेश यांनी हातातून हिसकावून घेतला. त्यानंतर पूजा राकेश सूर्यवंशी हिचे काका व भाऊ निलाखे यांनीही या कुटुंबाला मारहाण केली. या घटनेत सुहास गावडे यांचा उजवा हात फ्रॅक्चर झाला.

तर राकेश रमेश सूर्यवंशी यांनीही फिर्याद दिली. त्यानुसार सुहास गावडे, प्रिया गावडे, सुप्रिया सांगळे व त्यांचा पती तसेच अन्य एक नातेवाईक अशा पाच जणांविरोधात गुन्हा दाखल करण्यात आला. प्रिया व सुहास यांनी सूर्यवंशी यांच्या मुलांना शिवीगाळ केली. त्यावेळी त्यांनी शिवीगाळ करू नका असे सांगितले असता त्यांनाही शिवीगाळ करण्यात आली. काही वेळाने गावडे कुटुंब घरात आले. त्यावेळी सुप्रिया सांगळे यांच्या पतीने फिर्यादीच्या पत्नीचा हात पिरगळला. झटापटीत मंगळसूत्र ओढून तोडण्यात आले. सुप्रिया यांनी फिर्यादीच्या पत्नीला मारहाण केली. सुहास गावडे यांनी फिर्यादीला घरातून सोसायटी पार्किंगमध्ये आणत मारहाण केल्याचे फिर्यादीत म्हटले आहे.