संबंधित फोटो पाहिल्यानंतर तुमचं मन विचलित होऊ शकतं इतके भीषण ते फोटो आहेत. आरोपींनी प्रचंड हालहाल करुन संतोष देशमुखांची हत्या केली आहे. आरोपींनी पाईप, क्लच वायर, लोखंडी रॉड, साखळी, फायटर, दोर अशा विविध हत्यारांनी अमानुष मारहाण केली. आरोपींनी संतोष देशमुखांचे अंगावरील कपडे देखील फाडले होते. एखाद्या चित्रपटात दाखवल्यानंतर गुन्हेगार जशाप्रकारे हत्या करतात अगदी तशाच अमानुषपणे संतोष देशमुखांची हत्या करण्यात आली. या हत्येचे फोटो मन सुन्न करणारे आहेत. या घटनेवर संतोष देशमुखांचे भाऊ धनंजय देशमुख यांनी ‘टीव्ही 9 मराठी’ला प्रतिक्रिया दिली. यावेळी त्यांनी सर्व माध्यमांना सर्व फोटो आणि व्हिडीओ डिलीट करण्याची विनंती केली.

‘ते सर्व डिलीट करुन टाका, आम्ही जगू शकणार नाहीत’

“न्यायालयाच्या आधी एखादा कायदा करुन शिक्षा देता येत असेल तर या आरोपींना समाजाच्या हाती द्या. समाजातील लोक त्यांना शिक्षा देतील एवढंच मी आतातरी म्हणू शकेल. मी आपल्या माध्यमातून एकच विनंती करतो की, आज प्रसारमाध्यांवरुन जेवढे फोटो शेअर झाले आहेत ते सर्व डिलीट करुन टाका. माझी सर्वांना विनंती आहे. आम्ही जगू शकणार नाहीत. किंवा आम्ही राहू शकणार नाहीत. कारण जेवढा त्रास आरोपींनी त्रास दिला आहे ते असह्य करणारं आहे”, अशी भावना धनंजय देशमुख यांनी व्यक्त केली. “मला भावना खूप दाटून आल्या आहेत. मला आज बोलायची हिंमत होत नाही. मी त्या फोटोंवर बोलू शकत नाही”, असं धनंजय देशमुख म्हणाले.
Santosh Deshmukh: निपचित पडलेले देशमुख अन् आसुरी हसणारे मारेकरी; सरपंच हत्येचे काळजाचा थरकाप उडवणारे फोटो समोर
“ही घटना घडली त्यावेळेस जे हत्यारे होते, त्यांचे समर्थक सुरुवातीला या घटनेला जातीचं स्वरुप आणत होते. पण आम्ही सांगितलं की हे जातीपातीचं प्रकरण नाही. आम्ही जातीवाद करणारी माणसं नाही. हे सर्व आरोपींची विकृती हीच जात आहे. त्यांच्या कृत्याचे जे समर्थक आहेत त्यांना थोडी तरी मनात भावना असेल त्यांनी प्रसारमाध्यमांसमोर येऊन सांगावं की तुम्ही माणसाचेच औलाद आहात का”, अशा शब्दांत धनंजय देशमुखांनी संताप व्यक्त केला.