बीडच्या परळीतील महादेव मुंडे हत्या प्रकरणावरून ज्ञानेश्वरी महादेव मुंडे आक्रमक झाल्या आहेत. आजपासून बीड जिल्हाधिकारी कार्यालयासमोर महादेव मुंडेंच्या पत्नी ज्ञानेश्वरी मुंडेंनी आमरण उपोषण सुरू केलंय. लवकरात लवकर आरोपींना अटक करून न्याय द्या अशी मागणी ज्ञानेश्वरी मुंडेंनी केली आहे. 21 ऑक्टोबर 2023 रोजी परळी तहसील कार्यालय परिसरात महादेव मुंडे यांची निर्घुण हत्या करण्यात आली होती. या प्रकरणाला जवळपास दीड वर्ष होत असताना देखील यातील आरोपींना अटक झालेली नाहीत. हे प्रकरण भाजप आमदार सुरेश धस यांनी पुन्हा समोर आणलं. त्यानंतर या प्रकरणाची फाईल री ओपन झाली आहे. मात्र तरीही न्याय मिळत नसल्याने आज मुंडेंचं सर्व कुटुंब उपोषणाला बसलंय. त्यापूर्वी ज्ञानेश्वरी मुंडेंनी माध्यमांना प्रतिक्रिया देताना आता मागे हटणार नाही असं ठामपणे सांगितलं.