प्रशांत कोरटकर याने इंद्रजीत सावंत यांना दिलेल्या धमकी प्रकरणी आणि महापुरुषांबाबत केलेल्या आक्षेपार्ह वक्तव्याप्रकरणी कोल्हापूर येथील पोलीस ठाण्यात गुन्हा दाखल करण्यात आला आहे. या प्रकरणी अटकेपासून संरक्षण मिळावे यासाठी कोरटकरने कोल्हापूर सत्र न्यायालयात धाव घेतली होती. त्याने कोल्हापूर सत्र न्यायालयात अटकपूर्व जामीन अर्ज दाखल केला होता. त्याच्या जामीन अर्जावर कोल्हापूर सत्र न्यायालयात आज सुनावणी पार पडली. यावेळी न्यायालयाने दोन्ही बाजूंचा युक्तिवाद ऐकून घेतला.

कोल्हापूर सत्र न्यायालयाने दोन्ही बाजूंचा युक्तीवाद ऐकून घेतल्यानंतर प्रशांत कोरटकर याला 11 मार्चपर्यंत अटक न करण्याचे आदेश दिले. या प्रकरणी 11 मार्चला पुन्हा सुनावणी होणार आहे. पण तोपर्यंत प्रशांत कोरटकरला कोर्टाकडून अटकेपासून संरक्षण मिळालं आहे. कोल्हापूर पोलिसांना या प्रकरणी कोर्टाच्या आदेशानुसार उत्तर दाखल करावं लागणार आहे.

नेमकं प्रकरण काय?

कोल्हापूर येथील इतिहास संशोधक इंद्रजित सावंत यांना धमकी दिल्याप्रकरणात बेलतरोडी पोलिसांनी प्रशांत कोरटकरविरुद्ध गुन्हा दाखल केला. कोरटकरविरुद्ध दाखल झालेला हा दुसरा गुन्हा होय. बेलतरोडी पोलिसांनी झिरोअंतर्गत हा गुन्हा दाखल केला असून तो कोल्हापूर पोलिसांकडे वर्ग करण्यात येणार आहे. दरम्यान, कोल्हापूर पोलिसांनी दाखल केलेल्या गुन्हा प्ररकणाची पुढील सुनावणी 11 मार्चला होणार असून, न्यायालयाने कोल्हापूर पोलिसांचा ‘से’(म्हणणे मांडणे) मागितला आहे.

दीपक रमेश इंगळे यांनी दिलेल्या तक्रारीवरुन बेलतरोडी पोलिसांनी कोरटकरविरुद्ध गुन्हा दाखल केला. इंगळे यांनी दिलेल्या तक्रारीनुसार, 25 फेब्रुवारीला कोरटकर याने सावंत यांच्या मोबाइलवर संपर्क साधला. त्यांना शिवीगाळ करीत धमकी दिली. तसेच छत्रपती शिवाजी महाराज आणि छत्रप्ती संभाजी महाराज यांच्याबाबत अक्षेपार्ह विधान केले. त्यामुळे समाजभावना दुखावल्या आहेत. कोरटकरने जातीय तेढ निर्माण करण्याचा प्रयत्न केला आहे. कोरटकरच्या धमकीची ध्वनीफीत समाजमाध्यमांवर व्हायरल झाल्याने मराठा समाजात संतापली लाट उसळली आहे. त्याच्याविरोधात रोष व्यक्त करण्यात येत आहे. शिवभक्त आणि सकल मराठा समाजातर्फे शनिवारी महालमधील गांधीगेट ते संविधान चौकापर्यंत मोटारसायकल रॅली काढून कोरटकरविरुद्ध कठोर कारवाईची मागणी करण्यात आली.

दरम्यान, आपल्याला आणि कुटुंबातील सदस्यांना जीवे मारण्याच्या धमक्यांचे कॉल येत आहेत. समाजमाध्यमांवरूनही धमकी देण्यात येत आहे, अशी तक्रार कोरटकरची पत्नी पल्लवी कोरटकर यांनी बेलतरोडी पोलीस स्टेशनमध्ये केली आहे.

Rahul Solapurkar : राहुल सोलापूरकर यांच्या नावाने पुन्हा राजकारण तापणार? जितेंद्र आव्हाड यांचं ट्विट करत आरोप

तीन पथकांकडून कोरटकरचा शोध

दरम्यान, इतिहास संशोधक इंद्रजित सावंत यांना धमकी दिल्याप्रकरणात प्रशांत कोरटकर याचा पोलिसांच्या तीन पथकांकडून कसून शोध घेण्यात येत होता. धमकी प्रकरणात गुन्हा दाखल झाल्यानंतर कोरटकर हा नागपुरात पसार झाल्याची माहिती होती. कोल्हापूर पोलिसांचे पथक बुधवारी उशीरा रात्री नागपुरात दाखल झाले. त्यानंतर गुरुवारी सकाळी कोल्हापूर आणि बेलतरोडी पोलिसांच्या तीन पथकांनी कोरटकर याच्या बेस्यातील निवासस्थानी छापा टाकला. मात्र त्यांच्या निवासस्थानाला कुलूप असल्याने पोलिसांना प्रकरणाशी संबंधित पुरावे मिळाले नाहीत अथवा कुटुंबीयांची चौकशी करता आली नाही. कोरटकरच्या अटकेसाठी कोल्हापूर पोलिसांचे पथक नागपुरातच तळ ठोकून होतं.

कोरटकर याचा शोध घेण्यासाठी बेलतरोडी पोलिसांनीही तीन अधिकाऱ्यांसह नऊ कर्मचाऱ्यांच्या नेतृत्वातील दोन पथके स्थापन केली आहेत. कोरटकर कुठे-कुठे जाऊ शकतो तसेच त्याच्या मोबाइलचे लोकेशन घेण्याचे काम या पथकांकडे आहे. कोरटकर हा मध्यप्रदेशातील इंदूर आणि बालाघाट येथे जाण्याची शक्यता असल्याने स्थानिक पोलिसांनी मध्यप्रदेश पोलिसांनाही अलर्ट दिला आहे. दिसताक्षणी कोरटकरला अटक करण्यात यावी,अशी विनंती वजा सूचना स्थानिक पोलिसांनी मध्यप्रदेश पोलिसांना केल्याचे कळते.