माध्यमांशी संवाद साधताना अजित पवार म्हणाले, काल सकाळी पहाटे पुण्यातील स्वारगेट एसटी स्टँडवर एक अतिशय दुर्भाग्यपूर्ण घटना घडली. पोलिसांचा याप्रकरणी तपास सुरु आहे. माझं सीपींशी बोलणं झालं आहे. संशयितदृष्ट्या फिरणारा आरोपी शिरुर तालुक्यातील आहे. या प्रकरणी एकाला ताब्यात घेतलंय, पण तो अजून सापडलेला नाही.

अजित पवारांनी पुढे महाराष्ट्रात अशी दुर्दैवी घटना घडणं अतिशय क्लेशदायक असल्याचे म्हटले आहे. दरम्यान याप्रकरणातील सीसीटिव्हीमधूनही काही धक्कादायक गोष्टी समोर आल्या आहेत. या परिसरात असणाऱ्या दोन सीसीटिव्हींमधील एक सीसीटिव्ही कॅमेऱ्याची दिशाच बदलल्याने घटनेवेळीचे दृश्य त्यात कैद झालेच नाहीत. यातच अजित पवारांनी सर्व सीसीटीव्हीची बारकाईने पाहणी करायला सांगितली आहे, असे म्हणाले. ‘तेथील सीसीटीव्हीत प्रवासीही दिसतात. स्वारगेट आणि शिवाजीनगर या बस डेपोत ठिकाणी वर्दळ असते. काहीही करुन तो आरोपी सापडला पाहिजे. त्याला फाशीची शिक्षा झाली पाहिजे.’ असेही अजित पवार म्हणाले.

अजित पवार पुढे म्हणाले, ज्या मुलीवर हा प्रसंग उद्भवला आहे त्या मुलीच्या बाबतीत ज्या गोष्टींची आवश्यकता आहे त्या करण्याच्या सूचना दिल्या आहेत. मी त्या जिल्ह्याचा पालकमंत्री असल्याने मलाही ती गोष्ट ऐकल्यानंतर अतिशय मनस्ताप झाला. सूसंस्कृत महाराष्ट्राला आणि पुणेकरांना कोणालाही पटणारी ही घटना नाही. तो तरुण ताब्यात आल्यानंतर त्याच्यावर ताबडतोब कारवाई करायची, कशी करायची, ही केस लवकर कशी चालेल, याबाबत शक्य ते प्रयत्न करणार आहोत. त्याला कायद्यानुसार कठोरात कठोर शिक्षा होईल, असा शब्द पवारांनी दिला आहे.