छत्रपती शिवाजी महाराज आणि छत्रपती संभाजी महाराज यांच्याबद्दल आक्षेपार्ह वक्तव्य केल्याचा आरोप इंद्रजीत सावंत यांनी केला आहे. या पार्श्वभूमीवर कोरटकर याने सावंत यांना फोन करून धमकी दिल्याचा आरोप करण्यात आला आहे. सावंत यांनी ही फोनवरील संभाषणाची ध्वनिफीत सोशल मीडियावर शेअर केली आहे. यात कोरटकरने ‘ब्राह्मणांची ताकद दाखवू, तुम्ही कितीही मराठे एकत्र करा,’ असे वादग्रस्त वक्तव्य केले असल्याचे ऐकू येते. तसेच, त्याने अर्वाच्य भाषेत शिवीगाळ करून सावंत यांच्या घरात येऊन मारण्याची धमकी दिल्याचा दावा करण्यात आला आहे.
Chandrapur News: महाशिवरात्री ठरली काळरात्र; सहा जणांचा नदीत बुडून मृत्यू, तीन सख्ख्या बहिणींनी जीव गमावला
याप्रकरणी कोल्हापुरातील जुना राजवाडा पोलीस ठाण्यात प्रशांत कोरटकरविरोधात गुन्हा दाखल करण्यात आला आहे. कोल्हापूर पोलिसांचे पथक नागपूरच्या बेलतरोडी पोलीस ठाण्याच्या सहकार्याने कोरटकरला ताब्यात घेणार असल्याची माहिती आहे. पोलिसांच्या माहितीनुसार, कोरटकरला बुधवारीच कोल्हापुराला नेण्यात येईल.

दरम्यान, कोरटकर याने त्याच्या बचावासाठी हा ऑडिओ बनावट असल्याचा दावा केला आहे. “धमकी देण्यासाठी ‘एआय’चा वापर करून माझी बदनामी केली जात आहे,” असे म्हटले आहे. मात्र, गुन्हा नोंद होताच प्रशांत कोरटकर घरातून बेपत्ता असल्याचे कळते. कोल्हापूर पोलिसांनी त्याच्या अटकेसाठी हालचाली वेगवान केल्या आहेत. नागपूरच्या बेलतरोडी पोलिसांनी कोरटकरच्या घराला सुरक्षा दिली आहे. मात्र, तो घरात नसल्याने त्याचा शोध घेतला जात आहे. कोरटकरवर लवकरच कारवाई होण्याची शक्यता असून, या प्रकरणावर राज्यभरात चर्चा सुरू आहे.