आज सकाळीच पुणे पोलीस आयुक्त अमितेश कुमार यांनी दम दिला होता. त्यानंतर आता कोथरुड पोलिसांनी जगा मारणेला अटक केली आहे. पोलिसांनी याप्रकरणी पूर्वी ३ आरोपींना अटक केली होती. सध्या दोन अरोपी फरार असून पोलिसांकडून त्यांचा शोध सुरु आहे. गजा माणेची चौकशी केल्यानंतर उद्या त्याला न्यायालयात हजर केलं जाणार आहे.देवेंद्र जोग मारहाण प्रकरणातील मुख्य आरोपी बाब्या पवारला देखील कोथरूड पोलिसांकडून अटक करण्यात आली आहे.

देवेंद्र जोग मारहाण प्रकरणातील अटक केलेल्या तीन आरोपींवर पोलिसांनी मक्को लावला होता. तसेच, मारणे टोळीला नेस्तनाबूत करण्याची पोलिसांची भूमिका असून एकूण २७ आरोपी आमच्या रडारवर असल्याचं समोर आलं होतं. पोलीस आयुक्त अमितेश कुमार यांनी मारणे टोळीतील गुंडांची माहितीही मागवल्याचं समोर आलं होतं.

नेमकं प्रकरण काय?

छत्रपती शिवाजी महाराज यांच्या जयंतीदिनी म्हणजेच १९ फेब्रुवारीला देवेंद्र जोग हे त्यांच्या वैयक्तिक कामनिमित्त दुचाकीवरुन भेलेनगर परिसरात गेले होते. तेथे भेलकेनगर चोकात मारणे टोळीतील काहींनी मिरवणूक काढली होती. चौकात जाण्यासाठी जागा न मिळाल्यामुळे त्यांनी विचारणा केली. त्याचा राग आल्याने मारणे टोळीतील लोकांनी त्यांना थांबवून शिवीगाळ केली आणि त्यांना मारहाण केली. यामध्ये ते गंभीर जखमी झाले होते. या लोकांनी देवेंद्र जोग यांना दुचाकीवरुन पाडून त्यांना लाथाबुक्क्यांनी मारहाण केली त्यानंतर तेथून पळ काढला होता.

या घटनेने मुरलीधर मोहोळ यांनी याप्रकरणी संताप व्यक्त केला होता. मी माझ्या पुण्यात असं काही चालू देणार नाही. गुन्हेगारावर गुन्हा दाखल करत कारवाई करण्याच्या सूचनाही त्यांनी दिल्या होत्या.