पुण्यात वाढत्या गुन्हेगारीच्या पार्श्वभूमीवर केंद्रीय सहकार आणि नागरी विमान वाहतूक राज्यमंत्री मुरलीधर मोहोळ यांनी पुणे पोलिसांच्या कार्यप्रणालीवर नाराजी व्यक्त केली आहे. पुणे पोलिसांना आत्मपरीक्षण करण्याची गरज आहे, अशा शब्दांत त्यांनी पोलिसांवर टीका केलीये. केंद्रीय गृहमंत्री अमित शहा यांच्या स्वागतासाठी मुरलीधर मोहोळ पुणे विमानतळावर आले होते. यावेळी त्यांनी पत्रकारांशी संवाद साधला. पुण्यातील गंभीर गुन्हेगारी घटनांवर आणि टोळी प्रमुखांच्या सोशल मीडियावरील प्रभावावर नाराजी व्यक्त करत मोहोळ यांनी पुणे पोलिसांना खडसावले. “आमच्या शहरात अशा प्रकारची गुन्हेगारी खपवून घेतली जाणार नाही,” असा स्पष्ट इशाराही त्यांनी पोलीस आयुक्तांना दिला.