बारामतीचे बालगृह अधीक्षक रॉबर्ट वसंत गायकवाड यांनी शहर पोलीस ठाण्यात याप्रकरणी माहिती दिली. तपासात उघड झाले की, या बालगृहामध्ये सन २०१८ पासून दाखल असणारा मुलगा राजवीर वीरधवल शिंदे हा त्याचे दोन मित्र अर्जुन वाघारी व मोईन अमीर शेख असे तिघे मंगळवारी मंगळवारी १८ फेब्रुवारीला सायंकाळी साडे चार वाजता बालगृहामधून कोणाला काही न सांगता निघून गेले. खरंतर ते नटराज पार्क येथे फिरायला गेले होते. फिरल्यानंतर ते कालव्यात पोहोण्यासाठी उतरले. राजवीर याला पोहता येत नसल्याने तो पाण्यात बुडून वाहून गेला.

दरम्यान, गेल्या दोन दिवसांपासून त्याचा शोध घेतला जात होता. अखेर गुरुवारी त्याचा मृतदेह बांदलवाडी येथे कालव्यात आढळून आला. पोलिसांनी अकस्मात मृत्यूची नोंद केली आहे. तर पुढील तपास सुरु केला आहे.