शरद पवारांसोबत कसला रूसवा-फुगवा, एका विषयामध्ये आम्ही शिवसेनेच्या भावना व्यक्त केल्या. ज्या महादजी शिंदे यांच्या नावाने ज्या व्यक्तीला पुरस्कार दिला जातो त्यांनी असं कोणतं महान कार्य केलं? इतका शूर योद्धा महादजी शिंदेंच्या नावाने पुरस्कार मिळावा? महाराष्ट्र सदनमध्ये अखिल भारतीय मराठी साहित्य संमेलनाच्या बॅनरलखाली हा कार्यक्रम घेतला गेला. लोकांचा गैरसमज झाला की अखिल भारतीय मराठी साहित्य संमेलनाने हा पुरस्कार दिला. शरद पवारांची फसवणूक झाली, हा कार्यक्रम साहित्य संमेलनाचा नव्हता, तो खासगी कार्यक्रम होता. आमच्याकडे अशा अनेक खासगी संस्था असे पुरस्कार देत असतात. पण साहित्य संमेलनाच्या बॅनरखाली साहित्य परिषदेची परवानगी न घेता हा पुरस्कार दिला गेला हा आमचा आक्षेप असल्याचं संजय राऊत म्हणाले.

ही लोकशाही आहे, दोन स्वतंत्र विचारधारा आहेत. आमचं एखाद्या व्यक्तीविषयीच मत हे टोकाचं आहे. शरद पवारांचा पक्ष फोडण्याविषयीसुद्धा आमचं हेच मत आहे. शिवसेना आणि शरद पवाारांचा पक्ष अमित शहा आणि नरेंद्र मोदी यांनी फोडला, त्यांनी या लोकांना हाताशी धरलं, आमच्या भावना टोकाच्या आहेत. भांडण असण्याचा प्रश्न नाही, आम्ही आमचं मत मांडल्याचं राऊतांनी सांगितलं .

दरम्यान, आज दिल्लीमध्ये संध्याकाळी संजय राऊत आणि शरद पवार हे एकाच मंचावर असणार आहेत. एका पुस्तक प्रकाशनाच्या कार्यक्रमाला दोघे येणार आहेत. एकनाथ शिंदे यांना पवारांच्या हस्ते पुरस्कार दिल्यापासून राऊतांनी पवारांवर निशाणा साधला आहे.