या भीषण घटनेत परमेश्वर देवराये याचा दूर्देवी मृत्यू झाल्याची माहिती आहे. या प्रकरणी राम दत्ता पुरी या कंटेनर चालकावर पोलिसांत गुन्हा दाखल करण्यात आला आहे. या प्रकरणी रामचंद्र शिवराम पोले यांनी पोलिसांत फिर्याद दिली आहे.

नेमकं काय घडलं? कसा घडला हा भयंकर प्रकार?

याबाबत पोलिसांनी दिलेल्या अधिक माहितीनुसार, या घटनेतील आरोपी राम पुरी हा त्याचा मित्र परमेश्वर देवराये याच्यासोबत एका हॉटेलमध्ये जेवण करण्यासाठी आले होते. मात्र, जेवण झाल्यानंतर बिल देण्यावरून या दोन मित्रांमध्ये मोठा वाद झाला. या वादादरम्यान मित्र परमेश्वर याने आरोपी असलेल्या राम पुरी याला चापट मारली होती. याचाच राग राम पुरी याने मनात धरला होता. त्यानंतर राम पुरी याने रागाच्या भरात थेट कंटेनर सुरु केला आणि तो परमेश्वर देवराये याच्या अंगावर घातला. कंटेनर अंगावर घातल्याने परमेश्वर देवराये हे गंभीर जखमी झाले आणि त्यातच त्यांचा मृत्यू झाला.

ही घटना घडल्यानंतर पोलिसांना माहिती देण्यात आली. वाघोली पोलिसांनी तात्काळ घटनास्थल गाठलं आणि परमेश्वर देवराये यांचा मृतदेह ताब्यात घेऊन शवविच्छेदनासाठी पाठवला. तर, पोलिसांनी आरोपीलाही ताब्यात घेतलं असून त्याच्यावर गुन्हा दाखल करण्यात आला असल्याची माहिती देण्यात आली आहे.

पुण्यात गुन्हेगारीचा आलेख वाढताच

माणूस रागाच्या भरात कुठल्या थराला जाईल याचा काही नेम नाही. त्याचाच प्रत्यय पुण्यातील वाघोलीमध्ये आला आहे. अंगावर शहारे आणणारी ही घटना सर्वांचाच थरकाप उडवणारी आहे. पुण्यात दिवसेंदिवस गुन्हेगारी डोके वर काढत असल्याचं दिसत आहे. दररोज गुन्हेगारीच्या घटना समोर येत आहेत. या घटनांना आळा बसवण्याचं मोठं आव्हान पोलिसांसमोर आहे.