विशेष म्हणजे धनंजय मुंडे हे अजित पवारांच्या ‘देवगिरी’ बंगल्यावर दाखल झाल्यानंतर राष्ट्रवादी काँग्रेसचे ज्येष्ठ नेते प्रफुल्ल पटेल हे देखील तिथे दाखल झाले आहेत. त्यामुळे अजित पवारांच्या निवासस्थानी घडामोडींना वेग आलेला बघायला मिळत आहे. तीनही नेत्यांमध्ये नेमके काय खल सुरु आहेत ते अद्याप गुलदस्त्यात आहेत. पण राज्यातील घडामोडी पाहता काहीतरी नव्या घडामोडींचे हे संकेत तर नाहीत ना? अशी चर्चा आता सुरु आहे.

विरोधकांकडून धनंजय मुंडे यांच्या राजीनाम्याची मागणी

बीडच्या केज तालुक्यातील मस्साजोग गावचे सरपंच संतोष देशमुख यांच्या हत्या प्रकरणात धनंजय मुंडे यांचा निकटवर्तीय वाल्मिक कराड हा जेलमध्ये आहे. या प्रकरणी धनंजय मुंडे यांच्यावरही विरोधकांनी गंभीर आरोप केले आहेत. तसेच अनेकांनी धनंजय मुंडे यांच्या राजीनाम्याची मागणी केली आहे. विशेष म्हणजे धनंजय मुंडे यांच्याच पक्षाचे आमदार प्रकाश सोळंके यांनीदेखील आरोपांनंतर धनंजय मुंडे यांनी मंत्रिपदातून दूर व्हावं, असं म्हटलं होतं. पण आरोपांचं रान उठत असतानादेखील धनंजय मुंडे यांनी अद्याप राजीनामा दिलेला नाही. पण या प्रकरणात जो दोषी आढळेल त्याच्याबाबतीत हयगय केली जाणार नाही. त्याला सोडलं जाणार नाही, अशीदेखील भूमिका अजित पवार आणि राज्याचे मुख्यमंत्री देवेंद्र फडणवीस यांनी घेतली आहे.
देवेंद्र फडणवीस आज रात्री दिल्लीला जाणार, नेमक्या हालचाली काय?

राज्याच्या राजकारणात अनेक वेगवेगळ्या घडामोडी

महाराष्ट्राच्या राजकारणात सध्या अनेक वेगवेगळ्या घडामोडी घडताना दिसत आहेत. या दरम्यान धनंजय मुंडे हे अजित पवारांच्या भेटीला गेले आहेत. एकीकडे माजी मुख्यमंत्री उद्धव ठाकरे यांच्या पक्षाचे नेते मुख्यमंत्री देवेंद्र फडणवीस यांच्या भेटीगाठी घेत आहेत. दुसरीकडे ज्येष्ठ नेते शरद पवार यांच्या हस्ते उपमुख्यमंत्री एकनाथ शिंदे यांना दिल्लीत पुरस्कार प्रदान करण्यात आला. त्यानंतर शिंदेंच्या शिवसेनेच्या नेत्यांनी दिल्लीत शरद पवारांची भेटदेखील घेतली. तर बीडमध्ये संतोष देशमुख प्रकरणाचा तपास पुढे सरकत आहे. या सर्व घडामोडींदरम्यान धनंजय मुंडे हे अजित पवारांच्या भेटीला गेले आहेत.