हिंगोलीचे उबाठा गटाचे खासदार नागेश पाटील आष्टीकर यांची हदगांव तालुक्यातील तामसा येथे ममाध्यमिक व उच्च माध्यमिक शाळा आहे. या शाळेत आरोपी राजूसिंह चौहान हा मुख्याध्यापक पदी कार्यरत आहे. याच शाळेत एक विद्यार्थीनी दहावी वर्गात शिक्षण घेत होती. तुमची मुलगी हुशार आहे. तिला पोलीस अकॅडमीमध्ये भरती करतो, असं पालकांना सांगून अल्पवयीन मुलीवर तो नराधम अत्याचार करायचा. काही दिवसांपूर्वी नांदेड येथील पोलीस प्रशिक्षण केंद्र दाखवतो म्हणून त्याने तिला आपल्या चारचाकी वाहनातून नेले आणि पाण्यात गुंगीचे औषध देऊन तिच्यावर अत्याचार केला. चार ते पाच महिन्यांपासून हा प्रकार सुरु असल्याची माहिती आहे. दरम्यान, पीडिता गरोदर राहिली. ही बाब समजल्यानंतर शिक्षकाने धमकी देत तिचा गर्भपात केला. हा प्रकार मुलीने आपल्या आई वडिलांना सांगितला. तात्काळ मुलीच्या आईने तामसा पोलीस ठाणे गाठत शिक्षका विरोधात तक्रार दाखल केली. पोलिसांनी पोस्को अंतर्गत गुन्हा दाखल केला आहे. आरोपी शिक्षक फरार असून शोध सुरु असल्याची माहिती पोलीस अधीक्षक अबिनाश कुमार यांनी दिली.

अल्पवयीन विद्यार्थीनीवर शाळेतीलच मुख्याध्यापकाने अत्याचार केल्याची घटना उघडकीस आल्यानंतर एकच खळबळ उडाली. या घटनेचा सर्वत्र संतप्त व्यक्त केला जातं आहे. दरम्यान, घटनेच्या निषेधार्थ नागरिक आणि व्यापाऱ्यांनी तामसा शहर कडकडीत बंद पाळला. नागरिकांकडून पोलीस ठाण्यावर मोर्चा काढण्यात आला. आरोपीला तात्काळ अटक करण्यात यावी आणि गर्भपात करणाऱ्या डॉक्टरावर कठोर कारवाई करण्यात यावी, पीडित कुटुंबिलयाला आर्थिक मदत देण्यात यावी, अशी मागणी करण्यात आली.

खासदार नागेश पाटील आष्टीकराचे स्पष्टीकरण

दरम्यान, शाळेतील प्रकार उघडकीस आल्यानंतर खासदार नागेश पाटील आष्टीकर यांनी स्पष्टीकरण दिले आहे. ही घटना समजल्यानंतर मी मुख्याध्यापकाला निलंबित केले आहे. डीवाएसपी यांना घटनेची माहिती देऊन मुख्याध्यापका विरोधात कठोर कारवाई करण्याच्या सूचना केल्या आहे. मी अशी घटना खपवून घेणार नाही. नराधमाला शिक्षा व्हायला पाहिजे, अशी माझी भूमिका असल्याचे खासदार नागेश पाटील आष्टीकर म्हणाले.